Tags-Dil

yahī chāhatoñ kā usuul hai ki hatheliyoñ pe lahū sajā
use yaad rakhne kī aarzū hai to apne dil ko bhulā.e rakh

koī sham.a hai ki jo bujh ga.ī to na.e sire se jalā liyā
ye charāġh dil kā charāġh hai use āñdhiyoñ se bachā.e rakh

karūñ qat-e-ulfat butoñ se va-lekin
ye kāfir mirā dil nahīñ māntā hai

rashk-e-mahtāb hai ik dāġh-e-tamannā kab se
dil kā nazzāra karo aa ke sar-e-shām kabhī

maiñ ne ġhazal sunā.ī to ik ahl-e-dil 'rashīd'
siine pe haath rakh ke pukārā valī valī

Takrāo be-sabab jo nazar aur dil kā thā
afsāne sab ne ghaḌ liye ek raat ke

sach sach batā ki 'talḳh' ye dil kī navā meñ yuuñ
kaise kiye haiñ jam.a ye dukh kā.enāt ke

salīqe se maiñ us kī guftugū kā lutf letā huuñ
aur us ke rū-ba-rū dil meñ ḳhayāl-e-ḳhām rakhtā huuñ

ba-zāhir mad.h se us kī kabhī thaktā nahīñ lekin
darūn-e-ḳhāna-e-dil ḳhvāhish-e-dushnām rakhtā huuñ

tajāvuz se bhalā kab tak guzar auqāt mumkin thī
so apne ḳhuun tak shor-e-dil-e-badnām rakhtā huuñ

kaun paḌhtā hai yahāñ khol ke ab dil kī kitāb
ab to chehre ko hī aḳhbār kiyā jaanā hai

kahte haiñ unhīñ ko dushman-e-dil hai naam unhīñ kā nāseh bhī
vo log jo rah kar sāhil par mañjdhār kī bāteñ karte haiñ

mazāq-e-talḳh-pasandī na pūchh is dil kā
baġhair marg jise ziist kā mazā na milā

ḳhudā kī den nahīñ zarf-e-ḳhalq par mauqūf
ye dil bhī kyā hai jise dard kā ḳhazāna milā

talāsh-e-ḳhizr meñ huuñ rū-shanās-e-ḳhizr nahīñ
mujhe ye dil se gila hai ki rahnumā na milā

subuk-sarī ne girānī ajiib kī dil par
hai ab ye bojh ki vo bojh kyuuñ utārā thā

khiñchā jo tūl-e-shab-e-judā.ī añdherī madfan kī yaad aa.ī
nigāh o dil par vo yaas chhā.ī umiid jaatī rahī sahar kī

maqām-e-ibrat hai aah ai dil ḳhudā hī kī hai panāh ai dil
nahīñ hai kuchh zād-e-rāh ai dil adam se tākīd hai safar kī

vo jald yā-rab inhīñ ko taake lagā de do tiir in par aa ke
ye donoñ rah jaa.eñ phaḌphaḌā ke maiñ dekhūñ lāsheñ dil o jigar kī

huā huuñ chaurañg teġh-e-hasrat ki dafn kī hai mirī ye sūrat
kisī taraf ko hai dil kī turbat kahīñ hai turbat mire jigar kī