Tags-Dil

tumhāre vasl kī ḳhushiyoñ meñ dil ye kartā hai
tumhāre naam par āzād ik ġhulām kareñ

bas ik nazar meñ dil-o-jāñ figār kartā hai
vo shaḳhs kitne salīqe se vaar kartā hai

tumhāre ġham ko meñ dil se lagā ke rakhtā huuñ
yahī to hai jo mujhe bā-vaqār kartā hai

sitāra hai koī gul hai ki dil hai
tirī Thokar meñ patthar muḳhtalif hai

hai saath yuuñ din-rāt kā kañgnā se jaise haath kā
dil meñ uljhā hai yuuñ paa.el meñ jaise paañv re

urūj-e-ġham mire soz-e-jigar se aa pūchhā
maqām-e-dil kahīñ soz-e-nihāñ se ḳhālī hai

ik aisī baat hī taskīn-e-qalb baḳhshe hai
'nisār' dil mirā vahm-o-gumāñ se ḳhālī hai

kisī hasrat-zada ne ḳhud-kushī manzūr kī dil se
sadā labbaik kī sun kar zamīn-e-kū-e-qātil se

Thaharnā o dil-e-betāb phir tū bhī to siine meñ
nikal aa.e taḌap kar mauj jab āġhosh-e-sāhil se

koī tadbīr socho taaki dil aa jaa.e qaabū meñ
kahīñ maiñ qaid ho saktā huuñ in tauq-o-salāsil se

vo ab aate hī hoñge aur yaañ par aa ke baiTheñge
ḳhudāvandā ye bāteñ kab talak 'ālim' kare dil se

kis se kah kar halke ho leñ koī ab miltā hī nahīñ
dil meñ huuk bahut uThtī hai hoñToñ par sannāTā hai

vo haath jaise kahīñ ab bhī dil pe rakkhā ho
hinā ko bāñdhtā rahtā huuñ apne sheroñ meñ

Tapak ke dīda-e-nam se sadā.eñ detā hai
jo ek harf-e-tamannā dil-e-tabāh meñ thā

ham sā mile koī to kaheñ us se hāl-e-dil
ham ban ga.e zamāne meñ kyuuñ apnī hī misāl

vo jo tark-e-rabt kā ahd thā kahīñ TūTne to nahīñ lagā
tire dil ke dard ko dekh kar mire dil meñ dard hai kis liye

kūche meñ tumhāre ham jo Tuk aate haiñ
aur dil ko zarā baiTh ke bahlāte haiñ

dil kā haal chhupā luuñ to
achchhī duniyā-dārī ho

use to apnī bhī sūrat nazar nahīñ aatī
vo apne shīsha-e-dil kī to gard saaf kare

vahshat bharī rātoñ ko kināra nahīñ miltā
dil Duub chalā sub.h kā taarā nahīñ miltā