Tags-Dil

dil ko kahāñ hai sadma-e-rashk-e-adū kī taab
sau imtihāñ haiñ aur ye ik imtihāñ na ho

dil se hai dil ko raah ye sach hai agar 'hafīz'
mumkin nahīñ ḳhayāl yahāñ ho vahāñ na ho

ek sāhil hī thā girdāb-shanāsā pahle
ab to har dil ke safīne meñ bhañvar lagtā hai

dilbar ko dilbarī suuñ manā yaar kar rakhūñ
pītam ko apne piit suuñ gulhār kar rakhūñ

ek naum suuñ jagā.ūñ agar murda dil ke ta.iiñ
tā-hashr yād-e-haq mane bedār kar rakhūñ

rahtā hai dil har ek kā har ek kaam meñ ek
apnā ḳhayāl sūrat-e-parkār kar rakhūñ

pītam ke baaj nahīñ hai mirā iḳhtiyār kuchh
mujh dil ko tis ke amr meñ muḳhtār kar rakhūñ

dil pe mushkil hai bahut dil kī kahānī likhnā
jaise bahte hue paanī pe ho paanī likhnā

lahū ke nāchte dhāre ke sāmne ab tak
dil-o-dimāġh kī bechārgī nahīñ jaatī

ye dil kī raah chamaktī thī aa.ine kī tarah
guzar gayā vo use bhī ġhubār karte hue

kisī ne dil ke taaq par jalā ke rakh diyā hameñ
magar havā-e-hijr ne bujhā ke rakh diyā hameñ

vo yahīñ haiñ jo vo kahīñ bhī nahīñ
aa.iye dil meñ justujū to kareñ

ahl-e-duniyā mujhe samajh leñge
dil kisī din zarā lahū to kareñ

jaarī to ho sab ke liye farmān-e-mohabbat
kar dījiye dil se zarā ailān-e-mohabbat

is shaḳhs ko dukh-dard satātā bhī nahīñ hai
jis dil meñ rahā kartā hai īmān-e-mohabbat

hai harām kyā to halāl kyā ye hamāre dil pe hai munhasir
jise chāhe dil to halāl hai jo na chāhe dil to harām hai

mire dil meñ terī hī yaad hai tū basā huā hai ḳhayāl meñ
hai zabāñ pe terī hī guftugū mire lab pe terā hī naam hai

ai 'nahīf' tujh ko maiñ kyā kahūñ tujhe dil se kaise bhulā sakūñ
tirī sīdhī saadī sī guftugū tirā sīdhā saadā kalām hai

zor se saañs jo letā huuñ to akasr shab-e-ġham
dil kī āvāz ajab dard bharī aatī hai

pahlā patthar yaad hamesha rahtā hai
dukh se dil ābād hamesha rahtā hai