Tags-Dil

apne kahne meñ to dil mutlaq nahīñ kis se kaheñ
kyā kareñ ai nāseho kuchh to karo irshād tum

dil kī zamīñ par bo.e the 'bāqar' biij jo dard judā.ī ke
chaliye ab vo fasl khaḌī hai vaqt aayā hai kaTā.ī kā

ye aur baat hai ghabrā rahā hai dil varna
ġhamoñ kā bojh to sab ko uThānā paḌtā hai

zamāne ho ga.e haiñ chalte chalte
kahāñ jaatā ye dil kā rāsta hai

kisī ko ishq meñ bhī ab junūñ se vāsta nahīñ
ye kyā huā ki saare dil dimāġh ban ke rah ga.e

laakh rahe shahroñ meñ phir bhī andar se dehātī the
dil ke achchhe log the lekin thoḌe se jazbātī the

kyā maiñ tire is lutf ke qābil bhī nahīñ huuñ
ai jān-e-vafā dil hī dukhāne ke liye aa

tum ka.abe ko Dhāoge ye ma.alūm nahīñ thā
dil toḌ ke jāoge ye ma.alūm nahīñ thā

ik lamhe kī āvārā-nigāhī ke sahāre
dil meñ utar aaoge ye ma.alūm nahīñ thā

tum holī bhī kheloge mire dil ke lahū se
dāman bhī bachāoge ye ma.alūm nahīñ thā

ḳhūn-e-dil sarf kar rahā huuñ 'ravish'
ḳhuub se naqsh-e-ḳhūb-tar ke liye

mirī hālat ye kuchh maḳhsūs dil bechain haiñ lekin
ye mushkil hai kisī kī bekalī se kuchh nahīñ hotā

kis ne āvāz mujhe sāhil-e-jāñ se dī hai
naav kyuuñ dil kī lapaktī hai bhañvar kī jānib

za.afrānī khetoñ meñ ab makān ugte haiñ
kis tarah zamīnoñ se dil kā rābta māñgeñ

aap ko kyuuñ na tarāshā gayā mere dil se
sañg-e-marmar se hamesha ye sadā aatī hai

dil ik duniyā basā letā hai gar koī nahīñ aatā
faqat mahsūs kartā hai nazar koī nahīñ aatā

pesh-e-raqīb pursish-e-dil tum ne ḳhuub kī
dushman thā parda-dār na thā rāz-dāñ na thā

kyā jāniye kyā soch ke afsurda huā dil
maiñ ne to koī baat purānī nahīñ likkhī

tash.hīr to maqsūd nahīñ qissa-e-dil kī
so tujh ko likhā terī nishānī nahīñ likkhī

abrū-o-mizhgāñ se us ke dekheñ dil kyūñkar bache
ab to naubat aa ga.ī hai tiir aur talvār par