Tags-Dil

har zarra chashm-e-shauq-e-sar-e-rahguzar hai aaj
dil mahv-e-intizār hai aur kis qadar hai aaj

dil apnī talab meñ sādiq thā ghabrā ke sū-e-matlūb gayā
dariyā se ye motī niklā thā dariyā hī meñ jā kar Duub gayā

zabānoñ par nahīñ ab tuur kā fasāna barsoñ se
tajallī-gāh-e-aiman hai dil-e-dīvāna barsoñ se

dil-e-afsurda kā har gosha chhanak uThtā hai
zehn jab yādoñ kī zanjīr hilā detā hai

hāl-e-dil kitnā hī insān chhupā.e yaaro
hāl-e-dil us kā to chehra hī batā detā hai

jaane vaalā kab lauTegā
dil se ab bhī tum bachche ho

ai dil ai mere dil ye sunā hai ki shaam ko
ghar se vo chal paḌe the magar raat ho ga.ī

jab dil meñ zarā bhī aas na ho iz.hār-e-tamannā kaun kare
armān kiye dil hī meñ fanā armān ko rusvā kaun kare

jab apnā dil ḳhud le Duube auroñ pe sahārā kaun kare
kashtī pe bharosā jab na rahā tinkoñ pe bharosā kaun kare

ādāb-e-mohabbat meñ bhī ajab do dil milne ko raazī haiñ
lekin ye takalluf haa.il hai pahlā vo ishārā kaun kare

dil terī jafā se TuuT chukā ab chashm-e-karam aa.ī bhī to kyā
phir le ke isī TuuTe dil ko ummīd dobārā kaun kare

jab dil thā shagufta gul kī tarah Tahnī kāñTā sī chubhtī thī
ab ek fasurda dil le kar gulshan kī tamannā kaun kare

ik dard hai apne dil meñ bhī ham chup haiñ duniyā nā-vāqif
auroñ kī tarah dohrā dohrā kar us ko fasānā kaun kare

ġhamza paikān huā jaatā hai
dil kā armān huā jaatā hai

dekh kar uljhī huī zulf un kī
dil pareshān huā jaatā hai

terī vahshat kī badaulat ai dil
ghar bayābān huā jaatā hai

dil se jaate haiñ mire sabr-o-qarār
ghar ye vīrān huā jaatā hai

dil kī rag rag meñ samā kar 'bedam'
dard to jaan huā jaatā hai

jab se vo duur huā hai mirī in āñkhoñ se
dil mirā dil nahīñ ujḌā sā nagar lagtā hai

terī sūrat terī chāhat yādeñ sab
chhoTe se is dil meñ kyā kyā rakkhūñgā