Tags-Dil

tamannā ban ga.ī hai māya-e-ilzām kyā hogā
magar dil hai abhī tak tishna-e-paiġhām kyā hogā

vo betāb-e-tamāsha hī sahī ai tāb-e-nazzāra
laraz uThtā hai dil ye soch kar anjām kyā hogā

miTā kar dil nigāh-e-avvalīñ se
taqāzā-e-digar hai aur maiñ huuñ

dil ba-az-kāba hai yārāñ jubba-sā.ī chāhiye
hai ḳhudā kā ghar yahī lekin safā.ī chāhiye

sabhoñ kī aa ga.ī piirī jo tum javān hue
zamīñ kā dil huā miTTī ḳham āsmān hue

dil o nigāh meñ ik raushnī sī lagtī hai
tumhārī yaad se vābastagī sī lagtī hai

jī jalā.egā ye āvāra-o-be-dar honā
dil dukhā.eñge ye mahke hue ghar ab ke baras

kisī sūrat bhī radd hotā nahīñ ye faisla dil kā
nazar aatā nahīñ koī bhī tujh sā dūsrā mujh ko

kasāfat baar pā saktī nahīñ aisī latāfat meñ
karam us kā ki baḳhshā dil ke badle aabla mujh ko

vo dil-āvez āñkheñ vo lab-o-ruḳhsār vo zulfeñ
nahīñ ab dekhnā kuchh bhī nahīñ us ke sivā mujh ko

choT khaa.e dil kā mātam-dār hai
merā naala bhī taḌaptā jā.egā

dil ke hāthoñ ruuh agar ghabrā ga.ī
kaun us vahshī ko phir bahalā.egā

kho ga.e haiñ donoñ jānib ke sire
kaun dil kī gutthiyāñ suljhā.egā

dil ke hāthoñ se jo ghabrāoge 'shād'
kaun is vahshī ko phir samjhā.egā

chhūT na pāoge dil vaalo chāhat ke is zindāñ se
chāho to dil TuuT bhī jaa.eñ TūTegī zanjīr kahāñ

vaqt kā dariyā le bhī gayā vo sab jo dil-o-jāñ se thā aziiz
DhūñDh rahe ho sāhil par ab aañsū kī tahrīr kahāñ

jis ko dekhā so yahāñ dushman-e-jāñ hai apnā
dil ko jaane the ham apnā so kahāñ hai apnā

dasht meñ phuul khilā rakkhā hai
ham ne dil dil se milā rakkhā hai

zindagī kis tarah basar hogī
dil nahīñ lag rahā mohabbat meñ

na savāl-e-vasl na arz-e-ġham na hikāyateñ na shikāyateñ
tire ahd meñ dil-e-zār ke sabhī iḳhtiyār chale ga.e