Tags-Dil

tamām a.azā haiñ gumrāh ummatoñ kī tarah
bas ek dil hai jo kār-e-rasūl kartā hai

koī tamannā nahīñ hai mujh ko
sukūn-e-dil kī hī aarzū hai

is ashk o aah meñ saudā bigaḌ na jaa.e kahīñ
ye dil kuchh āb-rasīda hai kuchh jalā bhī hai

dil raakh ho chukā to chamak aur baḌh ga.ī
ye terī yaad thī ki amal kīmiyā kā thā

kyuuñ muqayyad huuñ zaat meñ apnī
jabki duniyā se dil lagātā huuñ

dil par sau rāheñ kholīñ inkār ne jis ke
'sāz' ab us kā naam tashakkur se hī lenā

hamāre dil kī tarah shahr ke ye raste bhī
hazār bhed chhupā.e hue se lagte haiñ

tār-e-nigāh-e-lutf se pahle rafū kareñ
phir mere zaḳhm-e-dil kī davā chāra-jū kareñ

phir un se arz-e-hāl kī kuchh aarzū kareñ
pahle dil-o-jigar ko jab apne lahū kareñ

pahle vo dil meñ soch leñ anjām kyā huā
luknat pe phir kalīm kī kuchh guftugū kareñ

donoñ ke donoñ ḳhanjar-e-ġham se haiñ chaak chaak
dil ko rafū kareñ ki jigar ko rafū kareñ

magar jo dil meñ thā vo kah ga.ī hai
sadā ḳhāmosh ho ke rah ga.ī hai

suunā suunā dil kā mujhe nagar lagtā hai
apne saa.e se bhī aaj to Dar lagtā hai

baañT rahā hai dāman dāman merī chāhat
apnā dil bhī kisī saḳhī kā dar lagtā hai

fitrat-e-dahr kā bharam rah jaa.e
dil kī nadiyā ko ik bhañvar denā

na jaane harf-e-talab hai nādim ki be-zabānī zabāñ hai apnī
dhaḌak rahā hai dil-e-tamannā ki manzil-e-āshiqī na.ī hai

zavāl-e-hastī ke nauha-ḳhvāñ the koī hamārī zabāñ na samjhā
bujhe haiñ sīnoñ meñ dil sabhī ke ki apnī āshuftagī na.ī hai

jo harf dil par raqam kiye the vo le uḌeñ yaas kī havā.eñ
ab is bayābān-e-ārzū meñ hamārī bechārgī na.ī hai

tire milne se hī ThanDā dil-e-ātish-fashāñ hogā
zarā sī aañch hogī kam jo siine meñ dhuāñ hogā

yahī to zindagānī hai ye is dil meñ na jā.egī
ki jis dil meñ sukūñ āsūdgī amn-o-amāñ hogā