tire milne se hī ThanDā dil-e-ātish-fashāñ hogā
zarā sī aañch hogī kam jo siine meñ dhuāñ hogā
chahakte haiñ ḳhayāloñ ke mire bulbul asīrī meñ
ki terī yaad ke pinjre meñ un kā gulsitāñ hogā
agar shauq-e-bulandī hai to paidā kar zamīñ apnī
vagarna tū kahāñ hogā tirā kyā āsmāñ hogā
yahī to zindagānī hai ye is dil meñ na jā.egī
ki jis dil meñ sukūñ āsūdgī amn-o-amāñ hogā
ġhulām us kī laToñ kā hai nahīñ goroñ kā ye 'aḳhtar'
kabhī āzād kyā dil kā mire hindostāñ hogā