suunā suunā dil kā mujhe nagar lagtā hai
apne saa.e se bhī aaj to Dar lagtā hai
baañT rahā hai dāman dāman merī chāhat
apnā dil bhī kisī saḳhī kā dar lagtā hai
mahrūmī ne jahāñ baserā DhūñD liyā hai
mujh ko to vo ghar bhī apnā ghar lagtā hai
merī barbādī meñ hissa hai apnoñ kā
mumkin hai ye baat ġhalat ho par lagtā hai
'josh' huuñ maiñ dīvane-pan kī us manzil meñ
jahāñ raqīb bhī apnā nāma-bar lagtā hai