Tags-Dil

us ne pūchhā mizāj kaisā hai
dil jo umDā huā thā bhar aayā

jab kiyā qasd-e-zabt-e-āh 'azīz'
dil meñ chhālā sā ik ubhar aayā

dil kī qīmat to mohabbat ke sivā kuchh bhī na thī
jo mile sūrat-e-zebā ke ḳharīdār mile

na aañkh roī na dil pasījā
tumhārā jaanā kamāl Thahrā

tumhārī yādeñ jahāñ bhī Thahrīñ
vahīñ pe dil meñ malāl Thahrā

na sahī pasand-e-hikmat ye shi.ār-e-ahl-e-dil hai
kabhī sar bhī de diyā hai ba-salāh-e-dost-dārāñ

mire ek dil kī ḳhātir ye kashākash-e-havādis
tire ek ġham ke badle ye hujūm-e-ġham-gusārāñ

kisī manchale ne bhejā hai mai-e-suḳhan se bhar kar
ki ye sāġhar-e-dil-afzā hai ye nazr-e-dil-nigārāñ

vahī kāfir ki jis kā naam taskīn-e-dil-o-jāñ thā
sitam hai ab usī ke naam se taklīf hotī hai

shikast-e-dil kī manzil se agar guzre to kyā hogā
abhī tum ko shikast-e-jām se taklīf hotī hai

dil-o-nigāh ke husn-o-qarār kā mausam
vo terī yaad tire intizār kā mausam

firāq lamhoñ ko ham ne hasīñ banāyā hai
sajā ke dil meñ tire e.atibār kā mausam

pal-bhar ḳhushī bhī ham ne ġhanīmat shumār kī
rahtī haiñ yuuñ bhī dil ko pareshāniyāñ bahut

merī ḳhāk-e-dil bhī āḳhir un ke kaam aa hī ga.ī
kuchh nahīñ to un ko dāman hī bachānā aa gayā

vo ḳharāsh-e-dil jo ai jazba-e-jazbī mirī hamrāz thī
aaj use bhī zaḳhm ban kar muskurānā aa gayā

sabā bhī us gul ke paas aa.ī to mere dil ko huā ye khaTkā
koī shagūfa na ye khilā.e payām laa.ī na ho kahīñ kā

na mehr o mah par mirī nazar hai na lāla-o-gul kī kuchh ḳhabar hai
faroġh-e-dil ke liye hai kaafī tasavvur us rū-e-ātishīñ kā

mānūs ho chalā thā tasallī se hāl-e-dil
phir tū ne yaad aa ke ba-dastūr kar diyā

vahāñ se lauT ke aane kā dil na kartā thā
palaT ke shahr meñ apne jahāñ se aa.e haiñ

ho koī bahrūp us kā dil dhaḌaktā hai zarūr
maiñ use pahchān letā huuñ nishānī dekh kar