Tags-Dil

zarūrat kyā hai rukne kī mire dil se nikaltā rah
havas mujh ko nahīñ ai nāla-e-shab-gīr sone kī

dostoñ se is qadar sadme uThā.e jaan par
dil se dushman kī adāvat kā gila jaatā rahā

har rasta pur-bahār huā hai abhī abhī
dil dil kā rāzdār huā hai abhī abhī

ashkoñ meñ tair uTThī lahū kī lakīr sī
dil par nazar kā vaar huā hai abhī abhī

aa jā ḳhudā ke vāste aa jā na der kar
dil merā vā-guzār huā hai abhī abhī

dil itnā kyuuñ dhaḌak rahā hai
maiñ kis kī nazar meñ aa gayā thā

kamre meñ aag lag ga.ī thī
dil jab kisī dhyān meñ lagā thā

dil kī masnad pe baiTh kar ishq
mujh aise ko sañvārtā thā

ishq meñ apne hī hāthoñ se huā do TukḌe
dil-e-nākām ne kār-e-sar-e-farhād kiyā

nā-tavānī meñ gire the jo lahū ke qatre
maiñ to bhūlā huā thā dil ne bahut yaad kiyā

nahīñ hai mahfil meñ koī garmī hue haiñ dil sard mutriboñ ke
dhuāñ nikaltā hai uñgliyoñ se raubāb bhī bujh ke rah ga.e haiñ

dāman-e-dil ko thaam letī hai
kitnī gustāḳh hai tumhārī yaad

vo log jin kī rifāqat kabhī na raas aa.ī
hue jo duur to dil ko bahut malāl huā

dil bhī qufl-e-abjad hai ek naam pūchhe hai
jaan le to khul jaa.e āḳhir is meñ hairat kyā

phir dil se 'fānī' saare ke saare naqsh-e-jafā miT jaate haiñ
jis vaqt vo zālim sāmne aa kar jān-e-hayā ho jaatā hai

purāne kāġhazoñ pe darj merī shā.irī shāyad
kisī majrūh dil ke zaḳhm kī maa.il ridā hogī

dil pe khaa.ī huī ik choT ubhar aatī hai
tere dīvāne ko barsāt se Dar lagtā hai

ai dil afsāna-e-āġhāz-e-vafā rahne de
mujh ko biite hue lamhāt se Dar lagtā hai

dil-e-barbād pe hai sāya-fagan yaad tirī
sāya-e-fazl-e-ḳhudā jaise gunahgār ke saath

dil meñ us shahr ke kuchh aks abhī baaqī haiñ
luT ga.e ham bhī jahāñ garmi-e-bāzār ke saath