Tags-Dil

dil meñ mere bhī yaqīñ aur gumāñ saath rahe
jaise inkār tire lab pe hai iqrār ke saath

hāsil-e-fan haiñ 'farīdī' vahī ash.ār-e-ġhazal
ḳhūn-e-dil jin meñ ho rañgīnī-e-afkār ke saath

dimāġh-o-dil pe ho kyā asar añdhere kā
ki dīda-var bhī hai ab ham-safar añdhere kā

dil tujhe naaz hai jis shaḳhs kī dildārī par
dekh ab vo bhī utar aayā adākārī par

isī ā.īne meñ kiran kiran kisī hūr-vash kī tajalliyāñ
yahī dil hai jām-e-jahāñ-numā yahī dil hai ḳhuld-e-barīñ mirī

ka.ī āftāb ka.ī qamar mire soz-e-dil se haiñ nūr-gar
ki misāl-e-sham.a sulag rahī hai azal se jān-e-hazīñ mirī

puurā kareñge holī meñ kyā vāda-e-visāl
jin ko abhī basant kī ai dil ḳhabar nahīñ

guzar hī jā.egā duniyā se be-talab ho kar
tire ḳhayāl se jis dil ko dostī hogī

hairāñ khaḌe hue unhīñ rāhoñ meñ haiñ hanūz
ai rahravān-e-kūcha-e-dil-dār ham bhī haiñ

duniyā meñ koī ishq se bad-tar nahīñ hai chiiz
dil apnā muft dījiye phir jī se jā.iye

na dil dhaḌakte haiñ mil kar na āñkheñ jhuktī haiñ
lahū kī gardisheñ ab misl-e-ābjū bhī nahīñ

koī to hotā jo siine se lagā kar kahtā
baat thī baat ko lete nahīñ dil par aise

dil-e-āshiq ko kyuuñ jalātā hai
ye bhī kyā koh-e-tūr hai terā

us sitamgar kā kyā kareñ shikva
o re dil sab qusūr hai terā

maiñ ne to jo bhī dil meñ thā chehre pe likh liyā
tū hai ki ek baar bhī paḌhtā nahīñ mujhe

sau bastiyāñ ujāḌiye dil ko na toḌiye
ye sañg-e-mohtaram ka.ī peshāniyoñ kā hai

ġham-e-daurāñ kī aziyyat bhī to dil sahtā hai
ġham-e-jānāñ ko bhī jāgīr kiye jā chup-chāp

maqsad-e-zindagī khultā hī chalā jā.egā
apne dil meñ use tasvīr kiye jā chup-chāp

vahī uslūb-e-sāda sharh-e-dil kā
kisī zinda rivāyat kī tarah thā

vo kaun dil hai jahāñ jalva-gar vo nuur nahīñ
is āftāb kā kis zarre meñ zuhūr nahīñ