Tags-Dil

sulūk-e-ahl-e-jahāñ dil pe naqsh hai 'ḳhāvar'
jahāñ the zaḳhm vahāñ aaj bhī nishān se haiñ

be-mehr-o-vafā hai vo dil-ārām hamārā
kyā jaane kyā hovegā anjām hamārā

ye dāġh-e-dil ki jin se rivāj-e-sahar chalā
nok-e-mizha pe ashk jo ubhrā kiran huā

ek dil tum se nahīñ hai raazī
jag meñ har ik suuñ burā.ī na karo

darūn-e-dil ḳhalish aisī khulī thī
ki jis kā rañg chehre par uḌā thā

kisī manzil meñ bhī hāsil na huā dil ko qarār
zindagī ḳhvāhish-e-nākām hī karte guzrī

sukūt-e-shām meñ yādoñ ke kārvāñ 'māhir'
dil-e-tabāh ke ujḌe nagar se guzre haiñ

kuchh uqde aise hote haiñ jo na hī khuleñ to behtar hai
kuchh bāteñ aisī hotī haiñ jinheñ dil meñ chhupā lenā achchhā

āmad-e-fasl-e-bahārāñ pe koī jashn to ho
dosto dil pe koī zaḳhm khilānā paḌegā

shā.irī ho to nahīñ saktī kabhī terā badal
kyā kareñ dil to kahīñ aur lagānā paḌegā

hamāre dil meñ ab talḳhī nahīñ hai
magar vo baat pahle sī nahīñ hai

bahut se fā.ede haiñ maslahat meñ
magar dil kī to ye marzī nahīñ hai

chāñd dhundlā hai chāñdnī gum hai
husn vāloñ meñ dil-kashī gum hai

mehnat-e-bāġh-bāñ kā zikr nahīñ
ġhul hai phūloñ se dil-kashī gum hai

chhāyā hai āsmāñ kī tarah qabr-e-ġhair par
dil meñ mire ġhubār bharā jo kabhī kā thā

dil ne mujhe ḳharāb kiyā kū-e-yār meñ
dushman par e'tibār mujhe dostī kā thā

dikh jā.egā dil is liye jaarī hue na ashk
dekho to paas naza.a meñ kitnā kisī kā thā

jis anjuman meñ baiTh gayā raunaq aa ga.ī
kuchh aadmī 'riyāz' ajab dil-lagī kā thā

fazā-e-tāza-nafas dilbarī kī aa.ī hai
na.ī na.ī ġham-e-dil kī masāfateñ niklīñ

soch le ye bhī har ummīd se pahle ai dil
ye sahārā tirī ġhairat ke munāfī to nahīñ