Tags-Dil

le chalā phir mujhe dil yār-e-dil-āzār ke paas
ab ke chhoḌ ā.ūñgā zālim ko sitamgār ke paas

ye jab hai ki ik ḳhvāb se rishta hai hamārā
din Dhalte hī dil Dūbne lagtā hai hamārā

nikal rahā huuñ maiñ us dil se is tarah 'sāhir'
ki jaise kaaT ke qaidī sazā nikal aa.e

jab raat kī tanhā.ī dil ban ke dhaḌaktī hai
yādoñ ke darīchoñ meñ chilman sī saraktī hai

zaḳhm haiñ dil pe kyā kyā na dekho
phuul chun lo lab-e-naġhmagar se

dil ġhanī hai to muflisī kyā hai
ghar meñ allāh ke kamī kyā hai

daulat bhī hai falsafa bhī hai jaah bhī hai
lutf-e-husn-e-butāñ-e-dil-ḳhvāh bhī hai

justajū-e-sukūn-e-dil thī mujhe
ġharq-e-dariyā-e-iztirāb huuñ maiñ

taqdīr kī gardish kyā kam thī is par ye qayāmat kar baiThe
be-tābi-e-dil jab had se baḌhī ghabrā ke mohabbat kar baiThe

āñkhoñ meñ chhalakte haiñ aañsū dil chupke chupke rotā hai
vo baat hamāre bas kī na thī jis baat kī himmat kar baiThe

ġham ham ne ḳhushī se mol liyā us par bhī huī ye nādānī
jab dil kī umīdeñ TuuT ga.iiñ qismat se shikāyat kar baiThe

hai dil kuuñ tapish kuchh aur hī aaj
laatā hai koī payām us kā

mat lījiyo dil tū chaah kā naam
qatl-e-āshiq hai kaam us kā

ba-qadr-e-paimāna-e-taḳhayyul surūr har dil meñ hai ḳhudī kā
agar na ho ye fareb-e-paiham to dam nikal jaa.e aadmī kā

sunī dil se 'rānā' jab us ne ġhazal
to ḳhush ho ke sad-marhabā kah diyā

is tarah dil ke armān puure hue
nāma-bar le ke ḳhat kā javāb aa gayā

gulshan-e-dil pe ik tāzgī chhā ga.ī
ban ke vo ik mujassam gulāb aa gayā

jis ke jaane se tārīk thī zindagī
ḳhāna-e-dil meñ bā-āb-o-tāb aa gayā

sambhaltā kyā sambhāle se tumhāre
ki dil ko be-qarārī aur hī thī

sabhī kuchh thā hamāre dil ke bas meñ
magar be-iḳhtiyārī aur hī thī