Tags-Dil

kyā aa ga.ī us meñ dil-e-betāb kī uljhan
gesū hai kisī kā ki sañvartā hī nahīñ hai

āñsuoñ se dil ke in dāġhoñ ko dho letā huuñ maiñ
dard jab had se guzar jaatā hai ro letā huuñ maiñ

shiddat-e-ehsās-e-ġham se jab bhī ghabrātā hai dil
āñsuoñ meñ apnī aahoñ ko Dubo letā huuñ maiñ

dard-e-ulfat dard-e-duniyā aur ye nanhā sā dil
ek kuuze meñ samundar ko samo letā huuñ maiñ

vahshat-e-dil kā ye aalam hai ki dushman ho yā dost
jo bhī mil jaatā hai us ke saath ho letā huuñ maiñ

sab jatan haiñ ye magar ik Dil-e-pur-ġham ke liye
jam.a kartī nahīñ daulat ko maiñ atom ke liye

dil gavārā nahīñ kartā hai shikast-e-ummīd
har taġhāful pe navāzish kā gumāñ hotā hai

gar jalva-e-jamāl kī dil ko hai aarzū
ashkoñ se chashm-e-shauq charāġhāñ to kījiye

honā hai dard-e-ishq se gar lazzat-āshnā
dil ko ḳharāb-e-talḳhī-e-hijrāñ to kījiye

ik lamha-e-nashāt kī gar hai havas 'shamīm'
dil ko halāk-e-hasrat-o-armāñ to kījiye

jab harīf-e-jāñ hī dil kī dhaḌkanoñ meñ aa base
ġhair mumkin hai kisī se dostī qaa.em rahe

dilkash na ho kyuuñ kalām 'asar' kā
sīkhā hai ye us ne 'mīr' se fan

dil ke dam se thā hasratoñ kā hujūm
ab vo sālār-e-kārvāñ na rahā

kyā hasīnoñ ne zulm chhoḌ diyā
dil meñ kyuuñ dard kā nishāñ na rahā

dil meñ mere vo chhup ke baiTh ga.e
jab koī un kā pāsbāñ na rahā

ab to dil ko na taab hai na qarār
yād-e-ayyām jab tahammul thā

jā phañsā dām-e-zulf meñ āḳhir
dil nihāyat hī be-tāmmul thā

gayā bazm-e-husn-o-jamāl meñ jo maiñ shauq-e-arz-e-talab liye
mire zehn-o-dil kā vo haal thā ki zabāñ se kuchh na kahā gayā

mire nāma-bar ne jo ḳhat diyā mujhe lā ke jān-e-bahār kā
huī zehn-o-dil kī vo kaifiyat na paḌhā gayā na sunā gayā

ba-hazār koshish-o-justujū mirā zaḳhm-e-dil na huā rafū
lage laakh marham-e-rañg-o-bū na bharā gayā na siyā gayā