Tags-Dard

maut se tere dard-mandoñ kī
mushkil āsān ho ga.ī hogī

hai aah dard-o-soz kī duniyā liye hue
tūfān-e-ashk-e-ḳhūn hai girya liye hue

maiñ dard-e-āshiqī ko samajhtā huuñ jān-o-rūh
kambaḳht vo bhī dil meñ kabhī hai kabhī nahīñ

abhī tak pāniyoñ meñ surma.ī saa.e utarte haiñ
abhī tak dhaḌkanoñ meñ dard kī mizrāb zinda hai

kamī na dard-e-jigar meñ hogī ye ham se aisī ne guftugū kī
davā ko phir DhūñDiyegā pahle talāsh karne asar ko chaliye

ujḌī jab se mahfil-e-yārāñ taur badal ga.e jiine ke
zaḳhm mirā pairāhan Thahrā dard mirā uslūb huā

chārasāzo mirā ilaaj karo
aaj kuchh dard meñ kamī sī hai

vo le gayā saath apne ujāle mire dil ke
kaaTe na kaTī ham se jo thī dard-bharī raat

ho jaa.e bakheḌā paak kahīñ paas apne bulā leñ behtar hai
ab dard-e-judā.ī se un kī ai aah bahut betāb haiñ ham

magar ye kyā ki ba-juz-dard kuchh hameñ na milā
ajiib shahr hai ye ek ajnabī ke liye

dard ke sab pairahan bhī ab sarāpā dard haiñ
ik kahānī chīḳhtī hai fikr-o-fan kī raah par

dard-mandī kā hunar bhī jis ke hāthoñ meñ nahīñ
ham ne dil ko vaar Daalā hai usī dargāh par

tū raaz samjhā nahīñ dard kī pahelī kā
vo dāstāñ thī mirī naam thā sahelī kā

tajarbe dard kī shabnam meñ nahā.eñ 'hurmat'
gul-fishāñ sho.ala-e-jāñ ho to ġhazal hotī hai

yaar tū yaar nahīñ baḳht haiñ so ulTe haiñ
kab talak ham ye saheñ dard-o-alam yā qismat

dard ban jā.egā ḳhud aap hī darmāñ 'shaidā'
talḳhī-e-zīst ko ash.ār meñ Dhāle jaao

sarmāya-e-dil āḳhir aur is ke sivā kyā hai
har dard se rishta hai har ġham se shanāsā.ī

ilāj-e-dard-e-dil-e-sogvār ho na sakā
vo ġham-navāz rahā ġham-gusār ho na sakā

kis nazākat se hai dekho ittihād-e-husn-o-ishq
zulf vaañ shāne ne khīñchī dard hai yaañ shāna meñ

ruuh ke jalte ḳharābe kā mudāvā bhī nahīñ
dard vo bādal hai jo khul kar barastā bhī nahīñ