Tags-Dard

shab-e-furqat meñ dard-e-dil se maiñ us vāste ḳhush huuñ
zabāñ par raat bhar rah rah ke terā naam aa.egā

tum dard kī lazzat kyā jaano kab tum ne chakhe haiñ zahr-e-subū
ham apne vajūd ke shāhid haiñ sañgsār hue shamshīr hue

nigāh-e-yār ko barham kiyā hai maiñ ne ḳhud akasr
kabhī jo dard ko dil ke zarā ārām dekhā hai

hai mohabbat koī bīmārī to bīmārī qubūl
haa.e 'manzar' kis maze kā dard apne dil meñ hai

yā ilāhī ḳhair yuuñ hamdardiyāñ hotī haiñ aaj
jaise mere dil kā saarā dard unhīñ ke dil meñ hai

diloñ ke dard jagā ḳhvāhishoñ ke ḳhvāb sajā
balā-kashān-e-nazar ke liye sarāb sajā

kaun sā dard utar aayā hai tahrīroñ meñ
saare alfāz janāze kī tarah lagte haiñ

apne hī dard kī uñglī se lagā rahne de
maiñ ġham-e-dahr kī is bhiiḌ se Dar jaatā huuñ

ik nazar meñ dard kho denā dil-e-bīmār kā
ye to adnā sā karishma hai nigāh-e-yār kā

dard kī shiddat meñ bhī chaltī hai mere dil ke saath
ik dhaḌaktī raushnī jo har jagah maujūd hai

ḳhushā vo daur-e-be-ḳhudī ki justujū-e-yār thī
jo dard meñ surūr thā to be-kalī qarār thī

mire dil ko mohabbat ḳhuub garmā.e to achchhā ho
ḳhalish baḌh kar ilāj-e-dard ban jaa.e to achchhā ho

sub.h-e-kāzib kī havā meñ dard thā kitnā 'munīr'
rail kī siiTī bajī to dil lahū se bhar gayā

do hukm haiñ shāh-e-ishq ke in meñ ek galnā hai ek jalnā
haiñ daftar-e-dard meñ qabāle ze-āb avval do.am ba-ātish

maiñ tirī āñkhoñ meñ apne liye kyā kyā DhūñDūñ
tū mire dard ko kuchh mujh se sivā jaane hai

do ghaḌī dard ne āñkhoñ meñ bhī rahne na diyā
ham to samjhe the baneñge ye sahāre aañsū

āḳhir koī kinārā is sail-e-be-karāñ kā
āḳhir koī mudāvā is dard-e-zindagī kā

dard kī gutthī suljhāne phir kyuuñ aa.e ho ḳhirad vālo?
bābā! ham ne tum ko jis uljhan se alag kar rakkhā hai

jaltā hai chārasāz kī nādāniyoñ pe jī
maiñ aur mere dard kā darmāñ tire baġhair

sahne ko to sah jaa.eñ ġham-e-kaun-o-makāñ tak
ai ḳhāliq-e-har-dard magar phir bhī kahāñ tak