Tags-Dard

kisī aur se kareñ kyuuñ gila hameñ apne-āp se dukh milā
vo jo dard-e-dil se ho āshnā use duniyā-bhar kā vabāl kyā

ai dard-e-firāq ke marīzoñ
gharrā lage is tarah karāho

husn yahāñ nazar-fareb dard yahāñ jigar-gudāz
haa.e ki miT gayā 'nushūr' jalva-e-be-sabāt par

maiñ terī yaad kī chādar ko oḌh letī huuñ
diloñ ke dard ridā.eñ bhī qaid kartī haiñ

mere sukūn-e-qalb ko le kar chale ga.e
aur iztirāb-e-dard-e-jigar de ga.e mujhe

TuuTā hai bas ḳhushī kā bharam aur kuchh nahīñ
paayā hai sirf dard-o-alam aur kuchh nahīñ

yuuñ baḌhī sā.at-ba-sā.at lazzat-e-dard-e-firāq
rafta rafta maiñ ne ḳhud ko dushman-e-jāñ kar diyā

thoḌā sā kahīñ jam.a bhī rakh dard kā paanī
mausam hai koī ḳhushk sā barsāt se aage

bah gayā aañkh se lahū ho kar
dil-e-dard-āshnā ko rote haiñ

dard sā dard hai bharā us meñ
TuuTe dil kī sadā ko rote haiñ

dil hī dil meñ uf vo dard-e-nā-gahāñ
āñkhoñ hī āñkhoñ meñ kuchh samjhā ga.e

kyā jaane kahāñ ḳhatm ho 'ash.har' kī kahānī
ab tak to kisī dard kā unvān rahī hai

koī qissa ho koī vāqi.a koī hikāyat ho
tasallī dil ko dard-e-dil ke afsāne se hotī hai

aur dabe dabe lahje meñ kahe tum ne ab tak baḌe dard sahe
tum tanhā tanhā jalte rahe tum tanhā tanhā chalte rahe

simaTtī phailtī tanhā.ī sote jāgte dard
vo apne aur mire darmiyān chhoḌ gayā

jo sail-e-dard uThā thā vo jaan chhoḌ gayā
magar vajūd pe apnā nishān chhoḌ gayā

ḳhvāboñ ke darīche meñ ho jaise koī chehra
yuuñ dard nikhartā hai sar-e-shām kisī kā

ham chale jaate haiñ is shahr ke jañgal se kahīñ
tum hameñ dard kī ḳhairāt to do jaate haiñ

ik baar dard-e-dil kā masīhā to ban ke dekh
ham ibtilā-e-ishq ke bīmār kam nahīñ

ma.āl-e-kashmakash-e-dard kuchh huā 'hirmāñ'
sunā hai maut kī ik niiñd le rahā huuñ maiñ