sitam-e-nā-ravā ko rote haiñ
charḳh terī jafā ko rote haiñ
ḳhuun rulvā rahī hai yād-e-vafā
ik sarāpā-vafā ko rote haiñ
is tarah aa.ī vaqt se pahle
aane vaalī qazā ko rote haiñ
ab ye us tak pahuñch nahīñ saktā
nāla-e-nā-rasā ko rote haiñ
bah gayā aañkh se lahū ho kar
dil-e-dard-āshnā ko rote haiñ
jaan le kar gayā vo āḳhir-e-kār
maraz-e-lā-davā ko rote haiñ
jaane vaale kī ye nishānī hai
dekh kar naqsh-e-pā ko rote haiñ
dard sā dard hai bharā us meñ
TuuTe dil kī sadā ko rote haiñ
rote jo aa.e the rulā ke ga.e
ibtidā intihā ko rote haiñ
rañg-o-bū ab kahāñ vo gul hī nahīñ
is chaman kī havā ko rote haiñ
hai fazā-e-chaman ġhubār-ālūd
ham mukaddar fazā ko rote haiñ
ḳhaak meñ milne ko hai sab kā husn
gul-e-rañgīñ qabā ko rote haiñ
mehñdī pis kar lahū rulātī hai
pisne vaalī hinā ko rote haiñ
nafas-e-sard ye banī bhī to kyā
mauj-e-bād-e-sabā ko rote haiñ
bāġh-e-ālam meñ is tarah be-dīd
nagis-e-nīm-vā ko rote haiñ
chhā ga.ī kaisī tīrgī un par
mehr-o-mah kī ziyā ko rote haiñ
kaam aayā na ye kisī ke bhī
ḳhizr āb-e-baqā ko rote haiñ
chup haiñ yuuñ jaise in meñ jaan nahīñ
lab-e-mojiz-numā ko rote haiñ
ab sū-e-asmāñ nahīñ uThtā
apne dast-e-duā ko rote haiñ
jaan ko le ke saath jaanā thā
is dil-e-mubtalā ko rote haiñ
de gayā dāġh-e-ġham ye kaun 'riyāz'
ham ġham-e-der-pā ko rote haiñ