Tags-Chehra

yahāñ kyā samā.ī dam-e-teġh qātil
ki nazroñ meñ hai saḳht jaanī kī sūrat

tum aur zikr-e-aġhyār par chup rahoge
kahe detī hai be-dahānī kī sūrat

araq-e-sharm se ḳhāksārī meñ huuñ maiñ
huā ḳhaak bhī maiñ to paanī kī sūrat

nazar ban ke phirtī hai āñkhoñ meñ apnī
kisī ālam-e-naujavānī kī sūrat

mujhe kushta dekhā to qātil ne pūchhā
yaqīñ hai yahāñ bad-gumānī kī sūrat

dikhāte haiñ vo raḳh se yuuñ naaz pinhāñ
ki alfāz jaise ma.ānī kī sūrat

nazar aa.e kyā jalva-e-husn baaqī
ki parda hai duniyā-e-fānī kī sūrat

vo is shakl se merī bālīñ pe aa.e
ki ik aafat āsmānī kī sūrat

barābar hai yahāñ būd-o-nābūd apnī
nishāñ hai mirā be-nishānī kī sūrat

ḳhalq meñ terā ham-jamāl kahāñ
DhūñDhiye sūrat-e-misāl kahāñ

ek duā kī sūrat tum ko chāhā thā
aur is meñ tāsīr banānā bhuul ga.e

koī mujh ko daur-e-zamān-o-makāñ se nikalne kī sūrat batā do
koī ye sujhā do ki hāsil hai kyā hastī-e-rā.egāñ se

zaḳhm kī sūrat nazar aate haiñ chehroñ ke nuqūsh
ham ne ā.īnoñ ko tahzīboñ kā maqtal kar diyā

dasht meñ aayā nahīñ nāqa-e-mahmil-bar-dosh
naqsh kuchh sūrat-e-naqsh-e-kaf-e-pā ho bhī chuke

kufr kyā taslīs kyā ilhād kyā islām kyā
tū bahar-sūrat kisī zanjīr meñ jakḌā huā

ik ahd kī sūrat hai ki paimān kī sūrat
tū dil meñ basā rahtā hai īmān kī sūrat

ai chāragaro aao mere sāmne aao
dekho to zarā be-sar-o-sāmān kī sūrat

aao to zarā baaġh meñ mil kar unheñ dekheñ
aa.e haiñ parinde yahāñ mehmān kī sūrat

ab ban ke yaqīñ dil meñ simaT aayā hai mere
āġhāz meñ lagtā thā jo imkān kī sūrat

TuuTā hai abhī tak na hī TūTegā kabhī bhī
rakhtī huuñ tujhe saath maiñ ik maan kī sūrat