ḳhalq meñ terā ham-jamāl kahāñ
DhūñDhiye sūrat-e-misāl kahāñ
lā.iye kis se himmat-e-ḳhud-kām
kījiye jur.at-e-savāl kahāñ
shauq-e-dīdār yak-nigāh durust
tāb-e-nazzāra-e-jamāl kahāñ
kaun pahuñchā tirī haqīqat ko
is qadar vus.at-e-ḳhayāl kahāñ
har adā terī ek aalam hai
tū kahāñ ālam-e-misāl kahāñ
merā zauq-e-junūñ agar be-asl
jazb hotā tirā jalāl kahāñ
zindagī sirf ġham huī 'hirmāñ'
ab kisī ġham kā ehtimāl kahāñ