Tags-Bijli

patañg kyūñkar na hove hairāñ ki sham.a shab ko dikhā rahī hai
ba-chashm-e-giryāñ o tāj-e-zar se falak pe bijlī zamīñ pe bārāñ

vo teġh khīñche hue hai sar par maiñ sar jhukā.e huuñ ashk-e-rezāñ
dikhā.ūñ ai dil tujhe kidhar se falak pe bijlī zamīñ pe bārāñ

hañse hai koThe pe merā yūsuf maiñ zer-e-dīvār ro rahā huuñ
azīzo dekho mirī nazar se falak pe bijlī zamīñ pe bārāñ

aur phir kyā huā kuchh yaad nahīñ hai mujh ko
ek bijlī thī ki siine meñ lapaktī huī aa.ī

chal haT bhī pare bijlī dal bādaloñ ko le kar
dahlā hai diyā terī talvāroñ kī shap shap ne

mire dil kā ḳhirman jalāne lagī hai
nazar un kī bijlī girāne lagī hai

shagufta ho ke baiThe the vo apne be-qarāroñ meñ
taḌap bijlī kī paidā ho ga.ī phūloñ ke hāroñ meñ

terī rahmat to musallam hai magar ye to batā
kaun bijlī ko ḳhabar detā hai kāshānoñ kī

kahīñ girī to hai bijlī zarā nazar kiije
kisī ġharīb kī palTī huī duā to nahīñ

bijlī ke chale jaane se Takrā ga.e kuchh log
cup chaa.e kā shervānī pe chhalkā ga.e kuchh log

ham-sūrat-e-ma.ashūq-e-tarah-dār hai bijlī
'asrār' ke ghar meñ bhī pur-asrār hai bijlī

ham-sūrat-e-ma.ashūq-e-tarah-dār hai bijlī
'asrār' ke ghar meñ bhī pur-asrār hai bijlī

ġhā.eb huī bijlī to huī fikr kī lo tez
logoñ ne usī vaqt kyā tanz ko mahmez

lo vaqt huā raat kā aur aah nadārad
bijlī abhī aa.ī thī abhī vaah nadārad

kabhī jhukte hue bādal kabhī girtī bijlī
kabhī uThtī huī āmāda-e-paikār āñkheñ

bijlī ke chamakne meñ kahāñ ishq kī garmī
vo shola-e-larzāñ-o-tapāñ aur hī kuchh hai

kabhī havā kabhī bijlī ke ham-rikāb huā
phir is ke ba.ad maiñ jiine meñ kāmyāb huā

jab nayā mahīna aatā hai to
bijlī kā bil aa jaatā hai

jab kaundtī hai bijlī tab jānib-e-gulistāñ
rakhtī hai chheḌ mere ḳhāshāk-e-āshiyāñ se

ḳhudā jaane chhalāvā thā ki bijlī
abhī niklā hai koī rū-ba-rū se