ab to shahroñ se ḳhabar aatī hai dīvānoñ kī
koī pahchān hī baaqī nahīñ vīrānoñ kī
apnī poshāk se hushyār ki ḳhuddām-e-qadīm
dhajjiyāñ māñgte haiñ apne garebānoñ kī
san.ateñ phailtī jaatī haiñ magar is ke saath
sarhadeñ TūTtī jaatī haiñ gulistānoñ kī
dil meñ vo zaḳhm khile haiñ ki chaman kyā shai hai
ghar meñ bārāt sī utrī huī gul-dānoñ kī
un ko kyā fikr ki maiñ paar lagā yā Duubā
bahs karte rahe sāhil pe jo tūfānoñ kī
terī rahmat to musallam hai magar ye to batā
kaun bijlī ko ḳhabar detā hai kāshānoñ kī
maqbare bante haiñ zindoñ ke makānoñ se buland
kis qadar auj pe takrīm hai insānoñ kī
ek ik yaad ke hāthoñ pe charāġhoñ bhare tasht
ka.aba-e-dil kī fazā hai ki sanam-ḳhānoñ kī