Tags-Bijli

kahīñ pe majma.a hai mai-kashoñ kā kahīñ akhāḌā hai un butoñ kā
kahīñ barasnā hai bādaloñ kā kahīñ pe bijlī chamak rahī hai

bijlī chamkī
aur ek dum-dār āb-ḳhor

girī thī aaj to bijlī hamīñ par
ye kahiye jhuk paḌe vo ham-nashīñ par

nigāh-e-shauq garam itnī ki bijlī
na aañch aa.e kahīñ us nāznīñ par

bādal chīḳh uThā hai bijlī TuuT paḌī hai tharrā kar
jab ham ne apnī barsī-barsā.ī aañkh uThā.ī hai

baḌī qurbāniyoñ ke ba.ad rahnā baaġh meñ hogā
abhī to āshiyāñ bijlī se jalvāne bahut se haiñ

havā us ko uḌā le jaa.e ab yā phūñk de bijlī
hifāzat kar nahīñ saktā mirī jab āshiyāñ merā

kis ke roke ruk sakā sail-e-ravān-e-zindagī
phuul khilte hī rahe bijlī chamaktī hī rahī

ye bijlī chamaktī hai kyuuñ dam-ba-dam
chaman meñ koī āshiyāna bhī hai

kisī ke bayābāñ ko gulshan banāyā
kisī ke gulistāñ pe bijlī girā dī

suntā huuñ ki ḳhirman se hai bijlī ko bahut laag
haañ ek nigāh-e-ġhalat-andāz idhar bhī

ḳhirman to dekh lete bijlī balā se girtī
hotā thā khet 'ārif' yuuñ pā.emāl apnā

hañse hai koThe pe merā yūsuf maiñ zer-e-dīvār ro rahā huuñ
azīzo dekho mirī nazar se falak pe bijlī zamīñ pe bārāñ

kidhar ko jā.ūñ nikal ke yā-rab ki garm-o-sard-e-zamāna mujh ko
dikhā.e hai shaam tak sahar se falak pe bijlī zamīñ pe bārāñ

vo shola-rū hai savār-e-tausan aur us kā tausan araq-fishāñ hai
ajab hai ik sair dopahar se falak pe bijlī zamīñ pe bārāñ

karo na dariyā pe mai-kashī tum udhar ko aao to maiñ dikhā.ūñ
sarishk-e-har-nāla-o-jigar se falak pe bijlī zamīñ pe bārāñ

sadā hai is āh-o-chashm-e-tar se falak pe bijlī zamīñ pe bārāñ
nikal ke dekho tum apne ghar se falak pe bijlī zamīñ pe bārāñ

kahāñ hai juuñ sho.ala shāḳh par gul kidhar hai fasl-e-bahār shabnam
tire hai e.ajāz-e-Turfa-tar se falak pe bijlī zamīñ pe bārāñ

'nasīr' likkhī hai kyā ġhazal ye ki dil taḌaptā hai sun ke jis ko
bañdhe hai yuuñ kab kisī bashar se falak pe bijlī zamīñ pe bārāñ

nahā ke afshāñ chuno jabīñ par nichoḌo bāloñ ko ba.ad is ke
dikhāo āshiq ko is hunar se falak pe bijlī zamīñ pe bārāñ