Tags-Beenai

chhīn le quvvat bīnā.ī ḳhudāyā mujh se
dekhā jaatā nahīñ ab terā tamāshā mujh se

sūraj se utarte haiñ mire har-bun-e-mū par
āñkheñ bhī rakhūñ band to bīnā.ī ajab hai

DhūñDhtā phirtā huuñ ḳhār-o-ḳhas-o-ḳhāshāk meñ husn
merī bīnā.ī ko sauġhāt-e-nazārā kam hai

merī bīnā.ī ke sab diip bujhā kar jaanā
sānehe saare mirī jaan guzarne denā

mere chehre pe ye māñgī huī āñkheñ na lagā
in meñ jo hai mirī bīnā.ī nahīñ ho saktī

bīnā.ī bhī apnī merī
ḳhvāb bhī mere apne haiñ

rusvā kiyā shu.ūr ko dānā.ī chhīn lī
jehl-e-ḳhirad ne āñkhoñ se bīnā.ī chhīn lī

pal bhar meñ kaise log badal jaate haiñ yahāñ
dekho ki ye mufīd hai bīnā.ī ke liye

merī jānib aa.e pas-manzar se patthar be-shumār
rañg-e-duniyā dekh kar bīnā.ī zaḳhmī ho ga.ī

toḌe haiñ bahut shīsha-e-dil jis ne 'nazīr' aah
phir charḳh vahī gumbad-e-mīnā.ī hai kam-baḳht

ro ro ke log kahte the jaatī rahegī aañkh
aisā nahīñ huaa, mirī bīnā.ī baḌh ga.ī

is nagar ke logoñ ko pahle baḳhsh bīnā.ī
aur baa'd meñ ḳhud ko is nagar kā iisā likh

ḳhush huuñ ik sitāre par dekh kar makāñ apnā
raat merī bīnā.ī kaun sī nazar laa.ī

rahe jab tak ye bīnā.ī salāmat
hamārī ḳhāma-farsā.ī salāmat

bīnā.ī-e-nāqis kā karishma hai ye 'turfa'
aiboñ meñ nazar aayā hunar vaqt se pahle

vaqt kī mīzān par bīnā.ī ḳhandāñ hai 'sharar'
kor-bīnoñ meñ bhī ab dīda-varī kā karb hai

chāhe tum merī bīnā.ī khurach Daalo phir bhī apne ḳhvāb nahīñ chhoḌūñgā
un kī lazzat aur aziyyat se maiñ apnā koī ahd nahīñ toḌūñgā

haañ maiñ bahkāoñ kī dhund nahīñ oḌhūñgā
chāhe tum merī bīnā.ī khurach Daalo maiñ phir bhī apne ḳhvāb nahīñ chhoḌūñgā

jin se thī insāf kī ummīd ahl-e-dard ko
ġhaur se dekhā to un āñkhoñ meñ bīnā.ī na thī

us kī āñkhoñ ko diye manzar sitāroñ ke magar
merī bīnā.ī kī ḳhātir aable rakkhe ga.e