Tags-Zindagi

zindagī jab zavāl par aa.ī
fan mirā tab uruuj par aayā

kahāñ utārūñ janāze ko zindagī tere
ki is ke bojh se shal ho chukā hai shāna mirā

vahī maiñ huuñ aur vahī zindagī vahī sub.h o shaam kī sar ḳhushī
vahī merā husn-e-ḳhayāl hai vahī un kī shān-e-jamāl hai

vahāñ kisī ko yaad bhī nahīñ thā merā naam tak
jahāñ maiñ apnī zindagī tamām kar ke aa gayā

ab adā ham se namāz-e-zindagī hotī nahīñ
dil jalāne se bhī ab to raushnī hotī nahīñ

maiñ ye kahtā huuñ ki har ruḳh se basar kī zindagī
zindagī kahtī hai har pahlū adhūrā rah gayā

ta.ana dete haiñ mujhe jiine kā
zindagī merī ḳhatā ho jaise

ye kahānī ye fasāna bas isī shab bhar kā hai
zindagī shīshe kī hai aur aadmī patthar kā hai

dard rag rag meñ kuchh is tarah utar jaatā hai
zindagī se bhī mukar jaane ko jī chāhtā hai

sab kī qismat ik na ik din jāgtī hai haañ bajā
zindagī kyuuñ kar guzāre vo jo is meñ shak kare

zindagī ḳhvāb-e-pareshāñ hai bahār ek ḳhayāl
in ko milne se bahut pahle ye sochā hotā

tujh se yak go na ta.alluq mujhe ik umr se thā
zindagī tū ne hī baḌh kar mujhe rokā hotā

yā ḳhalā par hukmarāñ yā ḳhaak ke andar nihāñ
zindagī DaT kar anāsir ke muqābil aa ga.ī

hāsil-e-ġham yahī samajhte haiñ
maut ko zindagī samajhte haiñ

har nafas minnat-kash-e-ālām hai
zindagī shāyad isī kā naam hai

mujh ko ḳhabar hai shaiḳh tujhe kuchh ḳhabar nahīñ
kyuuñ zindagī tabāh kiye jā rahā huuñ maiñ

pur-masarrat zindagī hai aaj kal ḳhvāb-o-ḳhayāl
hai zabāñ par in dinoñ sab kī azā-dārī kā naam

dil kī ḳhātir hī zamāne kī balā ho jaise
zindagī apne gunāhoñ kī sazā ho jaise

jab se apnā samajh liyā sab ko
mil ga.e kaam zindagī ke liye

jism-o-jāñ meñ dar aa.ī is qadar aziyyat kyuuñ
zindagī bhalā tujh se ho rahī hai vahshat kyuuñ