apne qadmoñ hī kī āvāz se chauñkā hotā
yuuñ mire paas se ho kar koī guzrā hotā
chāñdnī se bhī sulag uThtā hai vīrāna-e-jāñ
ye agar jānte sūraj hī ko chāhā hotā
zindagī ḳhvāb-e-pareshāñ hai bahār ek ḳhayāl
in ko milne se bahut pahle ye sochā hotā
dopahar guzrī magar dhuup kā aalam hai vahī
koī saaya kisī dīvār se utrā hotā
ret uḌ uḌ ke havāoñ meñ chalī aatī hai
shahr-e-armāñ sar-e-sahrā na basāyā hotā
aarzū umr-e-gurezāñ to nahīñ tum to nahīñ
ye saraktā huā lamha kahīñ Thahrā hotā
pīchhe pīchhe koī saaya sā chalā aatā thā
haa.e vo kaun thā muḌ kar use dekhā hotā
tujh se yak go na ta.alluq mujhe ik umr se thā
zindagī tū ne hī baḌh kar mujhe rokā hotā
jaane kyā soch ke logoñ ne bujhā.e haiñ charāġh
raat kaTtī to sahar hotī ujālā hotā
apne dāman ko jalā kar maiñ charāġhāñ kartā
agar is raakh meñ 'aḳhtar' koī sho.ala hotā