Tags-Wahm

kuchh jazb dil meñ jaan ke samjhe the un ko paas
ek vahm se yaqīn pe kyā kuchh gumāñ na thā

kuchh vahm sadd-e-rāh-e-sitam thā ki vaqt-e-zab.h
mere gulū pe ḳhanjar-e-qātil ravāñ na thā

ḳhālī dar un kā paayā to dil vahm se rukā
thā pāsbāñ meñ aap jo vahāñ pāsbāñ na thā

ye vahm dil ko satātā hai rū-ba-rū tere
ye terī diid kahīñ āḳhirī na ban jaa.e

kahīñ unheñ na ho ḳhanda-labī pe vahm-o-gumāñ
dikhā de bekasī ai chashm-e-be-qarār baras

kuchh dahan hī nahīñ vahm-e-sho.arā ke nazdīk
mū se bārīk kamar bhī hai gumānī terī

aqā.ed vahm haiñ maz.hab ḳhayāl-e-ḳhām hai saaqī
azal se zehn-e-insāñ basta-e-auhām hai saaqī

bas ik gubār-e-vahm hai ik kūcha-gard kā
dīvār-e-būd kuchh nahīñ aur dar bhī kuchh nahīñ

tiflān-e-kūcha-gard ke patthar bhī kuchh nahīñ
saudā bhī ek vahm hai aur sar bhī kuchh nahīñ

kyā vahm thā ki khulte hī lab band ho ga.e
kyā baat thī ki lafz bhī puurā nahīñ kiyā

is gumāñ kā ek vahm-e-ḳhud gurezāñ tak nahīñ thā
kyuuñ nahīñ thā kyuuñ nahīñ thā kyuuñ

vahm-e-nazāra meñ hai āfiyat-e-dīda-o-dil
bhuul kar bhī na kabhī parda-e-asrār uThā

asar us ke ishva-e-nāz kā jo huā vo kis se bayāñ karūñ
mujhe to ajal kī hai aarzū use vahm hai ki ye mar gayā

tasavvuroñ ke fareb uThā kar mushāhida vahm ban rahā hai
nazar ne khaa.e haiñ itne dhoke ki dekh kar bhī yaqīñ nahīñ hai

log be-mehr na hote hoñge
vahm sā dil ko huā thā shāyad

tire vajūd ke idrāk tak pahuñchtī huī
yaqīñ kī guuñj bhī maiñ vahm kī havā bhī maiñ

vahm tū hī ḳhalal-andāz huā hai varna
kaun juuyā nahīñ ai rahzan-e-īmāñ un kā

duniyā kā tamāshā dekh liyā ġhamgīn sī hai betāb sī hai
ummīd yahāñ ik vahm sī hai taskīn yahāñ ik ḳhvāb sī hai

jo zuhūr-e-ālam-e-zāt hai ye faqat hujūm-e-sifāt hai
hai jahāñ kā aur vajūd kyā jo tilism-e-vahm-o-gumāñ nahīñ

mirī be-ḳhudī hai vo be-ḳhudī ki ḳhudī kā vahm-o-gumāñ nahīñ
ye surūr-e-sāġhar-e-mai nahīñ ye ḳhumār-e-ḳhvāb-e-girāñ nahīñ