Tags-Shaam

maiñ ḳhizāñ kī shaam huuñ
rut bahār kī hai tū

shaam hotī hai to nikaltā huuñ
us kī palkoñ se chīḳhtā huā maiñ

apne hī aks ko paanī meñ kahāñ tak dekhūñ
hijr kī shaam hai koī to lab-e-jū aa.e

koī shaam aa rahī hai:
koī ḳhushnumā sitāra jo falak pe hañs rahā hai kisī mah-jabīñ kī sūrat

darīcha khole hue rañg aur ḳhushbū kā
suhānī-shām ko tasvīr kar rahī huuñ maiñ

tamām din to lahū chāTtā rahā sūraj
huī hai shaam chalo apne apne ghar jaa.eñ

dil aaj shaam se hī use DhūñDne lagā
kal jis ke ba.ad kamre meñ tanhā.ī aa.ī thī

shaam ko aaoge tum achchhā abhī hotī hai shaam
gesuoñ ko khol do sūraj chhupāne ke liye

jo sab pe bojh thā ik shaam jab nahīñ lauTā
usī parinde kā shāḳhoñ ko intizār rahā

shaam tere dayār meñ āḳhir
koī to apne ghar gayā hogā

parinda
sub.h se shaam tak

dil kī dahlīz pe jab shaam kā saaya utrā
ufuq-e-dard se siine meñ ujālā utrā

dhuñdlakā shaam kā chhāne lagā hai sochtī huuñ
ki is samay to parinde bhī lauT aate haiñ

maiñ sūkhī Daal huuñ lekin tumhārī yādoñ ke
parinde aa ke sar-e-shām baiTh jaate haiñ

tham ga.e ashk ki āñkhoñ meñ chamak lauT aa.e
ye diye shaam Dhalegī to farozāñ hoñge

vasl kī raat ke sivā koī shaam
saath le kar sahar nahīñ aatī

shaam parinde lauT aa.e to ham tirī khoj meñ chal nikle
phir jañgal meñ raat huī aur ghar kā rasta bhuul ga.e

ho jis ko tamām shab sar-e-shām
kyā vasl meñ vo sahar karegā

savād-e-shām-e-mohabbat hai dūd-e-be-ātish
tulū-e-sub.h-e-tamannā hai ātish-e-be-dūd

tark-e-mai kī huī talāfī yuuñ
naam saaqī kā sub.h o shaam liyā