Tags-Saqi

vahdat kā vo surūr thā saaqī ke jaam meñ
piine ko ham ne pī hai magar be-ḳhudī nahīñ

kyā sāqī-o-muġhannī kyā jaam kyā surāhī
ġhair-e-ḳhudā nako kah gar hai sharāb dan meñ

ab khetoñ meñ gandum hī nahīñ sonā bhī ugegā ai saaqī
baḳhshegā taġhayyur bhūkoñ ko ik roz mizāj-e-zarrātī

sāqī-o-mīnā-o-sāġhar ek aate haiñ nazar
bāda-e-vahdat se kyā sarshār āñkheñ ho ga.iiñ

kashtī-e-mai le ke ai saaqī pahuñch bahr-e-ḳhudā
be tire mahfil meñ dariyā-bār āñkheñ ho ga.iiñ

kiyā mirā tazkira jo saaqī ne bāda-ḳhvāroñ kī anjuman meñ
to piir mai-ḳhāna sun ke kahne lagā ki muñh phaT hai ḳhaar hogā

guzar gayā ab vo daur saaqī ki chhup ke piite the piine vaale
banegā saarā jahān mai-ḳhāna har koī bāda-ḳhvār hogā

mai to Dhal kar rahegī ai saaqī
kuchh ye ma.ashūq kā shabāb nahīñ

be-mai-o-mai-ḳhāna-o-sāqī jo aa.ī mujh ko maut
halqa-e-mātam hai daur-e-charḳh-e-mīnā.ī nahīñ

na sahbā hai na sāġhar hai na miinā hai na ḳhum saaqī
mujhe jo mast kartī hai tirī āñkhoñ kī mastī hai

bane haiñ jab se vo saaqī maze kī mai-parastī hai
idhar mai hai piyāloñ meñ udhar āñkhoñ meñ mastī hai

saaqī tirī nigāheñ kab tak raheñgī palTī
hai nashsha zāhidoñ ko aur bāda-ḳhvār haiñ ham

dekh saaqī ko apne dariyā-dil
zarf-e-mai-kash baḌhā.e baiThe haiñ

saaqī ke ta.iiñ bulāo uThā do tabīb ko
mastoñ ke hai maraz kī jahāñ meñ davā sharāb

saaqī mujhe ḳhumār satā.e hai lā sharāb
martā huuñ tishnagī se ai zālim pilā sharāb

saaqī kuchh aaj tujh ko ḳhabar hai basant kī
har sū bahār pesh-e-nazar hai basant kī

garmī thī kahīñ aah ham afsurda-diloñ meñ
saaqī kī faqat hai ye ināyāt kī garmī

qad-a-shā.ir ke badle dekhiye me.ayār sheroñ kā
faqat itnā mirī ġhazloñ kā ye paiġhām hai saaqī

kareñge amn kī bāteñ diloñ meñ buġhz rakkheñge
yahī rasm-e-jahāñ aur fitrat-e-aqvām hai saaqī

merī gañg-o-jaman tahzīb kī duḳhtar hai ye urdu
ise muslim banāne kī ye sāzish aam hai saaqī