Tags-Raushni

kamāl-e-lailā to dekho ki sirf naam liyā
''phir us ke ba.ad charāġhoñ meñ raushnī na rahī''

sard-o-shādāb havā ruk ga.ī kohsāroñ kī
raushnī ghaT ga.ī do-chār ghaḌī tāroñ kī

rañg dikhlātī hai yuuñ dil kī safā yāroñ meñ
raushnī sub.h kī jis tarah ho gulzāroñ meñ

halqa-e-zulmat meñ hai rāhoñ kī sahmī raushnī
yā chamaktī haiñ ghanī jhāḌī se āñkheñ sher kī

nazar bachā ke jise dekhte the mere harīf
samā gayā mirī āñkhoñ meñ raushnī kī tarah

band haiñ dil ke darīche raushnī mādūm hai
ab jo apnā hashr honā hai hameñ ma.alūm hai

raushnī le kar chalūñgā to mujhe
tum se bhī pahle aur koī DhūñDh legā

sifāt meñ zaat hai numāyāñ huī vo bāliġh-nazar hai nisbat
kiyā hai mahv-e-jamāl-e-jānāñ ye sair-qalbī kī raushnī hai

vo aayā turbat pe bevafā gul har ik se afsurda ho ke pūchhā
ye kis kī mash.had pe hai charāġhāñ jo ibrat-añgez raushnī hai

raushnī lene chale the aur andhere chhā ga.e
muskurāne bhī na paa.e the ki aañsū aa ga.e

kabhī kabhī to añdherā bhī ḳhūb-sūrat hai
tirā ḳhayāl kahīñ raushnī na ban jaa.e

is jahāñ meñ pyaar mahke zindagī baaqī rahe
ye duā māñgo diloñ meñ raushnī baaqī rahe

ye tez raushnī rātoñ kā husn khā ga.ī hai
tumhāre shahr meñ ham apnī chāñdnī se ga.e

jalva-gar sochoñ meñ haiñ kuchh āgahī ke āftāb
raushnī se likh rahā huuñ zindagānī kā nisāb

na.e charāġh jalā yaad ke ḳharābe meñ
vatan meñ raat sahī raushnī manāyā kar

raushnī ke zāviyoñ par munhasir hai zindagī
aap ke bas meñ nahīñ hai aap kā saaya yahāñ

bahut sī umr miTā kar jise banāyā thā
makāñ vo jal gayā thoḌī sī raushnī ke liye

ham jo ġhol-e-bayābāñ se vāqif nahīñ
chal diye duur kī raushnī kī taraf

apne māhaul meñ kyuuñ añdherā kareñ
der tak dekh kar raushnī kī taraf