manzileñ laakh kaThin aa.eñ guzar jā.ūñgā
hausla haar ke baiThūñgā to mar jā.ūñgā
chal rahe the jo mere saath kahāñ haiñ vo log
jo ye kahte the ki raste meñ bikhar jā.ūñgā
dar-ba-dar hone se pahle kabhī sochā bhī na thā
ghar mujhe raas na aayā to kidhar jā.ūñgā
yaad rakkhe mujhe duniyā tirī tasvīr ke saath
rañg aise tirī tasvīr meñ bhar jā.ūñgā
laakh rokeñ ye añdhere mirā rasta lekin
maiñ jidhar raushnī jā.egī udhar jā.ūñgā
raas aa.ī na mohabbat mujhe varna 'sāqī'
maiñ ne sochā thā ki har dil meñ utar jā.ūñgā