Tags-Pyas

tire sogvāroñ kī zindagī kabhī mutma.in na guzar sakī
jo bujhī kabhī koī tishnagī ka.ī aur dard machal ga.e

tishnagī maiñ ne bujhā lī ye hunar thā varna
ḳhizr kā dil bhī rah-e-umr meñ pyāsā niklā

chhat par khaḌe haiñ phir bhī nazar āsmāñ pe hai
paanī meñ tishnagī kī milāvaT hai dosto

tishnagī kab ke gunāhoñ kī sazā hai 'qaisar'
vo kuaañ suukh gayā jis pe musāfir Thahre

merā ik ik harf paimāna mirī iizā kā hai
tishnagī kī vus.ateñ haiñ ye karam dariyā kā hai

maiñ talab ke dasht meñ phir chukā to ye raaz mujh pe ayaañ huā
mirī tishnagī ke ye pher haiñ ki jo aab se haiñ sarāb tak

saaqī se jo jaam le na baḌh kar
vo tishnagī tishnagī nahīñ hai

hamārī tishnagī se bhī koī masrūr hotā hai
hamārī pyaas ko labrez sāġhar likh diyā jaa.e

bas us ke ba.ad hī mīThī nadī hai
kahā āvārgī ne tishnagī se

sairābiyāñ 'jamīl' ko itnā na de sakīñ
jitnā ki faizyāb hue tishnagī se ham

kisī ke ashk ne sairāb kar diyā 'shāh-jī'
so ham ġharīb-e-vatan tishnagī ko bhuul ga.e

shāyad use hamārī anā kā gumāñ na thā
ham tishnagī paTak ke samundar se aa.e haiñ

māñgtā huuñ bāda-e-ishq-e-davām
tishnagī apnī baḌhāne ke liye

haiñ tā-ba-hadd-e-nazar silsile sarāboñ ke
shadīd-tar huā ehsās-e-tishnagī bhī to kab

sakūñ miltā hai un kī yaad kar ke
ilāj-e-tishnagī ḳhud tishnagī hai

mire kis kaam kā aisā samundar
lab-e-sāhil bhī jis ke tishnagī hai

kyā duā-e-farsūda harf-e-be-asar māñgūñ
tishnagī meñ jiine kā ab koī hunar māñgūñ

bazm-e-jām-o-mīnā meñ dād-e-tishnagī diije
mausam-e-bahārāñ meñ hasrat-e-numū kiije

maiñ na jaane kitne janmoñ kā huuñ pyāsā dosto
rah ke dariyā meñ bhī mujh ko tishnagī Dastī rahī

har nazar ko ārzūoñ kā samundar baḳhsh kar
har zabāñ par tishnagī tahrīr kar dī jā.egī