Tags-Pyas

yam-ba-yam phailā huā hai pyaas kā sahrā yahāñ
ik sarāb-e-tishnagī hai mauja-e-sahbā yahāñ

saaqī mujhe ḳhumār satā.e hai lā sharāb
martā huuñ tishnagī se ai zālim pilā sharāb

fareboñ se kahāñ tak dil ko ham 'āzād' bahlā.eñ
sarāb-e-dasht shiddat tishnagī kī kam nahīñ karte

vo aur hoñge pī ke jo sarshār ho ga.e
har jaam se hameñ to na.ī tishnagī milī

sahrā meñ vafūr-e-tishnagī se
saa.e ko sahāb likh rahā huuñ

aañkh vaale sāvan meñ ek baat dekhī hai aur kah bhī duuñ tum se
tishnagī miTātā hai dil kī tishnagī kā ye qudratī shikārī hai

phir bhī paanī kī mujhe qīmat adā karnī paḌī
mere lab par tishnagī kā zā.iqa honā hī thā

bas ek aalam supurdagī kā
bas ek dariyā-e-tishnagī thā ki jis kī maujeñ

tumhārī tishnagī dekhī nahīñ ga.ī mujh se
maiñ apnī ok meñ dariyā uThā ke laayā huuñ

na rū-ba-rū kisī ḳhvāhish kī tishnagī hogī
na us ke hoñToñ kā shādāb zā.iqa hogā

dil meñ mere pal rahī hai ye tamannā aaj bhī
ik samundar pī chukūñ aur tishnagī baaqī rahe

ik vasl kī ghaḌī ko tarastī rahī sadā
ik tishnagī sadā rahī dil ke dayār meñ

apnā muqaddar thā yahī ai mamba-e-āsūdgī
bas tishnagī bas tishnagī go paas thā dariyā tirā

kar lī hai tauba is liye vaa.iz ke sāmne
ilzām-e-tishnagī mire saaqī ke sar na jaa.e

uThā ke pheñk do khiḌkī se sāġhar-o-mīnā
ye tishnagī jo tumheñ dastiyāb ho jaa.e

maiñ yaum-e-āshūr tishnagī kā sarāb ban kar
ḳhalīl-zādoñ ke ḳhālī kūzoñ meñ rah chukā huuñ

unheñ to karbalā kī tishnagī āvāz detī thī
vo dariyā the unheñ shahr-e-madīna chhoḌ denā thā

nā-murādī se mire dil kī ḳhalish kam na huī
tishnagī aur baḌhī hasrat-e-nākām ke ba.ad

subū liye tishnagī khaḌī thī ye jāntī thī
ki jāñ-faroshoñ ko qaus-e-shamshīr dekhtī hai

ser-shikamī kā bhuuk se hai milāp
ruuh kī tishnagī sambhāliye aap