ser-shikamī kā bhuuk se hai milāp
ruuh kī tishnagī sambhāliye aap
raqs-farmā huī vo sīm-tanī
be-zarī kī bahār ne dī thaap
shahar vaale haiñ kholtā laavā
galī-kūchoñ se uTh rahī hai bhaap
nā-murādī ke baḌhte silsile ko
na.e paimāna-e-sitam se naap
is ko namrūd kā taqāzā jaan
ātish-e-husn ko na baiTh ke taap
ḳhāmushī to ilāj-e-dard nahīñ
baat bantī nahīñ hai aap se aap
tū bhī kah de jo tere jī meñ hai
sun rahā huuñ maiñ har anāp-shanāp
koī aayā na gosha-e-dil tak
shāh-rah par sunī thī paañv kī chaap
yuuñ hī shāyad mizāj badle tirā
mere ash.ār apne naam se chhāp
vaqt, mausam 'nazar' nigāh meñ rakh
kis ne tujh se kahā ye raag alaap