vo chashm mā.il-e-lutf-o-karam huī bhī to kab
ujaḌ chukā hai dil apnī ḳhushī milī bhī to kab
utar chukā hai rag-e-jāñ meñ zahr-e-tanhā.ī
use bhī fursat-e-chāragarī milī bhī to kab
haiñ tā-ba-hadd-e-nazar silsile sarāboñ ke
shadīd-tar huā ehsās-e-tishnagī bhī to kab
sumūm-e-ġham ke asar se jhulas chukā hai badan
dayār-e-jāñ meñ havā-e-tarab chalī bhī to kab
ukhaḌtī sāñseñ aur is ruḳh kī diid ai 'ābid'
nazar kī pyaas bujhī to magar bujhī bhī to kab