Tags-Politics

zamīñ ke paas kisī dard kā ilaaj nahīñ
zamīn hai ki mire ahd kī siyāsat hai

aur kuchh der yūñhī jañg siyāsat maz.hab
aur thak jaao abhī niiñd kahāñ aa.egī

ye be-nūr andhī siyāsat kā bāzār hai
maslahat kī dukāñ hai

jā ke pahle zarā shā.irī ko samajh
ye atā hai mirī jaañ siyāsat nahīñ

tabāh kar diyā ahbāb ko siyāsat ne
magar makān se jhanDā nahīñ utartā hai

in se ummīd na rakh haiñ ye siyāsat vaale
ye kisī se bhī mohabbat nahīñ karne vaale

jalāl-e-pādshāhī ho ki jamhūrī tamāshā ho
judā ho diiñ siyāsat se to rah jaatī hai chañgezī

tum ne jiine kā mujhe hausla baḳhshā hai to phir
mujh se rahte ho gurezāñ ye siyāsat kaisī

ye shahr hai vo shahr ki jis meñ haiñ be-vaj.h kāmyāb chehre
yahāñ siyāsat kī āñdhiyoñ ne miTā diye māhtāb chehre

pastī-e-siyāsat ko tū ne apne qāmat se rif.at dī
īmāñ kī tañg-ḳhayālī ko insāñ ke ġham kī vus.at dī

jahāñ adab meñ siyāsat chalī jaatī hai
vahāñ bhī rañg jamānā koī mazāq nahīñ

qatl sūraj ko kiyā vo bhī chhupā kar ḳhanjar
shaam vāloñ ne sahar meñ ye siyāsat kī hai

siyāsat ne paḌhā rahzan kā kalma
baḌī zillat huī hai rahbaroñ kī

jis ko tum chāho koī aur na chāhe us ko
is ko kahte haiñ mohabbat meñ siyāsat karnā

hasīñ hai shīsha-o-āhan kā imtizāj magar
tirī siyāsat-e-āhan-garī na jā.egī

logoñ ke dard-o-ġham bhī siyāsat ke zehn meñ
jhanḌoñ se ek din ko hī phahre utar ga.e

ham ko rakhtī hai nishāne pe siyāsat un kī
ghar jalāne pe ba-zid barq-e-tapāñ ho jaise

sharīk-e-bazm-e-siyāsat haiñ kuchh bure chehre
zarā qarīb to aao ki raushnī kam hai

hamārī un kī siyāsat kā rañg ḳhuub hai vaah
ki ham imaam to vo sarbarāh rakhte haiñ

ahl-e-dānish hue arbāb-e-siyāsat ke murīd
aisī pastī pe mire dil meñ chhurī lagtī hai