Tags-Politics

jaane kab is meñ hameñ aag lagānī paḌ jaa.e
ham siyāsat ke janāze ko chitā kahte haiñ

phir maiñ huuñ aur mahfil-e-jānāñ kī aarzū
phir mehrbāñ siyāsat-e-darbāñ hai āj-kal

us kī sardārī se ab inkār karnā chāhiye
raushnī detā nahīñ sūraj siyāsat ke baġhair

tamām chīzeñ haḌapne ke ba.ad bhī bhūkī
siyāsat aisī hai la.anat-ma.āl kyā kahiye

ishq jis se na ho sakā us ne
shā.erī meñ ajab siyāsat kī

añdherā is qadar hai shahr par chhāyā siyāsat kā
kisī bhī shaḳhs kī ab shakl pahchānī nahīñ jaatī

maiñ to bholā-bhālā 'vasīm' aur vo fankār siyāsat kā
us ke jab ghaTne kī baarī aa.ī mujh ko joḌ liyā

hameñ to ahl-e-siyāsat ne ye batāyā hai
kisī kā tiir kisī kī kamān meñ rakhnā

vaise aḳhlāq kī do chaar kitābeñ paḌh kar
ham ko aatā hī nahīñ harf-e-siyāsat likhnā

maslahat kahiye use yā ki siyāsat kahiye
chiil kavvoñ ko bhī shāhīn kahā hai maiñ ne

siyāsat kī dukānoñ se ḳharīdeñ haiñ na.e chehre
sabhī rahbar baneñ phirte haiñ ik rahzan nahīñ miltā

chalte chalte daf.atan paTrī badalne kā chalan
thā siyāsat ke qalābāzoñ kā yak mash.hūr fan

azmat-e-mulk is siyāsat ke
haath nīlām ho rahī hai ab

ḳhudā maiñ ho gayā phir ik tasādum
aqīdoñ meñ siyāsat aa ga.ī hai

ahl-e-siyāsat baañT rahe haiñ jaan se pyāre logoñ ko
maiñ shā.ir huuñ sach kahtā huuñ kyuuñ un kī tāzīm karūñ

mulk to mulk gharoñ par bhī hai qabza us kā
ab to ghar bhī nahīñ chalte haiñ siyāsat ke baġhair

phir vaqt kā palḌā sirf siyāsat aur tash.hīr meñ jhuul gayā
do chaar purāne jame rahe par 'mīrā-jī' ko ek zamāna bhuul gayā

jis ahd-e-siyāsat ne ye zinda zabāñ kuchlī
us ahd-e-siyāsat ko marhūm kā ġham kyuuñ hai

ye ibādat hai ibādat meñ siyāsat kaisī
is meñ ka.aba yā kalīsā nahīñ dekhā jaatā

jahāñ ik dūsre ko ham sadā dushman samajhte haiñ
siyāsat ne hamesha ham ko us paale meñ rakkhā hai