Tags-Maut

zindagī ḳhud meñ 'amar' ḳhush thī bahut
maut ne kar dī sharārat kaisī

dushman kī maut kā tumheñ kyūñkar na ho malāl
ik bā-vafā jahāñ meñ vahī thā vahī nahīñ

ilm uThā letā hai bazm-e-jāñ se sham-e-etaqād
ḳhāl-o-ḳhad kī maut hai chehre kī shān-e-ijtihād

jaane kis dam le uḌe ye maut kā jhoñkā 'amar'
ek din ḳhāk-e-badan ko ḳhud meñ zam karte hue

auj-e-himmat pe rahā terī vafā kā ḳhurshed
maut ke ḳhauf pe ġhālib rahī ḳhidmat kī umed

maut mahrāshTra kī thī yā tirī marne kī ḳhabar
murdanī chhā ga.ī insān to kyā patthar par

maut ne raat ke parde meñ kiyā kaisā vaar
raushani-e-sub.h vatan kī hai ki mātam kā ġhubār

qayāmat aa ga.ī ab to galā murdār kā kāTeñ
kahāñ tak maut ko zinda tire bīmār rahne deñ

ye maut na thī qudrat ne tire sar par rakkhā ik tāj-e-hayāt
thī ziist tirī merāj-e-vafā aur maut tirī merāj-e-hayāt

jis saañs meñ duniyā jaañ paa.e us saañs kī nik.hat kyā kahiye
jis maut pe hastī naaz kare us maut kī azmat kyā kahiye

tahzīb jahāñ tharrātī hai tārīḳh-e-bashar sharmātī hai
maut apne kaTe par ḳhud jaise dil hī dil meñ pachhtātī hai

bām-o-dar par maut kā parcham hai lahrāyā huā
aa rahī hai har qadam par bū-e-anfās-e-vabā

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

ġharaz shāyad ye hai 'ranjūr' qabl-az-maut mar jaa.e
chale ho tum jo yuuñ bahr-ayādat aaj ban-Than ke

bas ek maut kī had tak pahuñch sakī hai nigāh
kahāñ milī abhī dariyā-e-sānehāt kī thaah

koī ahl-e-dil ko kamī nahīñ magar ahl-e-dil kā ye qaul hai
abhī maut bhī nahīñ mil sakī abhī zindagī meñ kasar bhī hai

vahī dard bhī hai davā bhī hai vahī maut bhī hai hayāt bhī
vahī ishq nāvak-e-nāz hai vahī ishq sīna-sipar bhī hai

be-mai-o-mai-ḳhāna-o-sāqī jo aa.ī mujh ko maut
halqa-e-mātam hai daur-e-charḳh-e-mīnā.ī nahīñ