Tags-Adoo

hamāre kaan lafz-e-bevafā sun hī nahīñ sakte
ye ḳhil.at to udū ke vāste sarkār rahne deñ

ye fiqre haiñ ye chāleñ haiñ nazar lākhoñ meñ uTh jaatī
udū ke sāmne vo ho ga.e nā-chār rahne deñ

maiñ aur roz-e-vasl-e-adū aur shab-e-firāq
yahāñ āsmāñ na thā ki vahāñ āsmāñ na thā

so ye javāb hai merā mire adū ke liye
ki mujh ko hirs-e-karam hai na ḳhauf-e-ḳhamyāza

sar-e-maqtal-e-shab-e-ārzū rahe kuchh to ishq kī aabrū
jo nahīñ adū to 'farāz' tū ki nasīb-e-dār koī to ho

itnī ḳhalish mizha kī ab baḌh ga.ī ki goyā
zaḳhm-e-dil-e-adū meñ ḳhanjar-guzār haiñ ham

bholī sūrat kī hai ḳhūbī varna
ho adū dost-numā kyā baa.is

hir phir ke un kī aañkh udū se laḌe na kyuuñ
fitna ko kartī hai nigah-e-fitna-zā pasand

sau baar band-e-ishq se āzād ham hue
par kyā kareñ ki dil hī adū hai farāġh kā

adū bhī tum ko chāhe ai tirī shaan
laḌāte haiñ ham apnī aarzū se

na pūchho ham se ki kyā sabab hai siyāh rozī kā apnī 'sālik'
chamak rahā hai bahut dinoñ se adū pe vo āftāb-e-āriz

ye rañg-e-bazm-e-adū to dekho ki laakh parde kiye haiñ haa.il
naqāb uThā.e vo go haiñ baiThe magar hai ġhairat hijāb-e-āriz

nahīñ kyā karoge na ham ko sunāo
shikāyat adū kī magar ho ga.ī

ye jhūTī mohabbat se un kī husūl
shikāyat adū kī agar ho ga.ī

dil-e-kushāda meñ mere ho anjuman-ārā
adū ba-rañg-e-kudūrat jahāñ na ho dāḳhil

zindagī ban ga.ī adū sī 'shujā.a'
aur hameñ maut bhī nahīñ aa.ī

merā shikva tirī mahfil meñ adū karte haiñ
us pe bhī sabr ham ai arbada-jū karte haiñ

tere dil-tafta kī turbat pe adū jhūTā hai
gul na hoñge sharar-e-ātash-e-sozāñ hoñge

ranj kyā vasl-e-adū kā jo ta.alluq hī nahīñ
mujh ko vallāh hañsātā hai rulānā terā

āshiq hue vo jaise adū par ye haal hai
rakh kah ke haath dekhte haiñ baar baar dil