Tags-Khoon

ḳhuun hai jis kī javānī kā bahār-e-rozgār
jis ke ashkoñ par farāġhat ke tabassum kā madār

bekasoñ ke ḳhuun meñ Duube hue haiñ tere haat
kyā chabā Dālegī o kambaḳht saarī kā.enāt

ḳhuun jis kā dauḌtā hai nabz-e-istiqlāl meñ
loch bhar detā hai jo shahzādiyoñ kī chaal meñ

ḳhuun jis kā bijliyoñ kī anjuman meñ bāryāb
jis ke sar par jagmagātī hai kulāh-e-āftāb

qindīl-e-sahar nūr-e-manzil ḳhurshīd-e-sahar sham-e-sāhil
ye ḳhūn-e-shahīdāñ kā maḳhzan ye dard-e-rafīqāñ kā hāsil

kaam shabnam kā liyā dīda-e-tar se apne
maiñ ne sīñchā hai use ḳhūn-e-jigar se apne

ḳhuun ruḳh par dauḌtā hogā tirī āvāz se
tujh ko paalā hogā terī maañ ne kis kis naaz se

aa.iyo ai ashk ab bahne lagā hai ḳhūn-e-garam
bhejiyo paanī ki ātish-bār āñkheñ ho ga.iiñ

larzāñ tarsāñ bar-sar-e-mizhgāñ ḳhuun ke aañsū haiñ 'tāriq'
sham-e-farozāñ shahr meñ le kar ḳhūnī manzar dekhā hai

ḳhuun se mere huī yak-dam ḳhushī tum ko to lek
muft meñ jaatā rahā jī ek be-taqsīr kā

kahtā hai ye pukār ke ḳhūn-e-shahīd-e-nāz
qātil maiñ tere gosha-e-dāmāñ se duur huuñ

ḳhūn-e-jigar kare hai dil ko lahū kare hai
ye daur aadmī ko yuuñ surḳh-rū kare hai

ba-hal shauq-e-shahādat meñ kiyā hai ham ne ḳhuun apnā
hamāre shauq se purze uḌaa.e jis kā jī chāhe

haar dekhā bhī ḳhūn-e-āshiq kā
aap aur sar jhukā.e baiThe haiñ

jinheñ sīñchā thā ḳhūn-e-dil se agle bāġhbānoñ ne
taraste ab haiñ paanī ko vo paude mere gulshan meñ

barbariyat kī jahāñ meñ garm-bāzārī huī
ādmiyat kī ragoñ meñ ḳhuun ThanDā ho gayā

ḳhuun se farhād ke rañgīñ huā dāmān-e-koh
kyuuñ na mauj-e-shīr ye dhabbā chhuḌā kar le ga.ī

aate aate aañkh tak dil kā lahū paanī huā
kis qadar arzāñ hai apne ḳhuun kā saudā yahāñ