Josh Malihabadi

kisan

Josh Malihabadi

1898-1982
jhuTpuTe kā narm-rau dariyā shafaq kā iztirāb
khetiyāñ maidān ḳhāmoshī ġhurūb-e-āftāb
dasht ke kām-o-dahan ko din kī talḳhī se farāġh
duur dariyā ke kināre dhuñdle dhuñdle se charāġh
zer-e-lab arz o samā meñ bāhamī guft-o-shunūd
mish.al-e-gardūñ ke bujh jaane se ik halkā sā duud
vus.ateñ maidān kī sūraj ke chhup jaane se tañg
sabza-e-afsurda par ḳhvāb-āfrīñ halkā sā rañg
ḳhāmushī aur ḳhāmushī meñ sansanāhaT kī sadā
shaam kī ḳhunkī se goyā din kī garmī kā gilā
apne dāman ko barābar qat.a sā kartā huā
tīrgī meñ khetiyoñ ke darmiyāñ kā fāslā
ḳhār-o-ḳhas par ek dard-añgez afsāne kī shaan
bām-e-gardūñ par kisī ke ruuTh kar jaane kī shaan
duub kī ḳhushbū meñ shabnam kī namī se ik surūr
charḳh par bādal zamīñ par titliyāñ sar par tuyūr
paara paara abr surḳhī surḳhiyoñ meñ kuchh dhuāñ
bhūlī-bhaTkī sī zamīñ khoyā huā sā āsmāñ
pattiyāñ maḳhmūr kaliyāñ aañkh jhapkātī huī
narm-jāñ paudoñ ko goyā niiñd sī aatī huī
ye samāñ aur ik qavī insān ya.anī kāst-kār
irtiqā kā peshvā tahzīb kā parvardigār
jis ke māthe ke pasīne se pa.e-izz-o-vaqār
kartī hai daryūza-e-tābish kulāh-e-tājdār
sar-nigūñ rahtī haiñ jis se quvvateñ taḳhrīb kī
jis ke buute par lachaktī hai kamar tahzīb kī
jis kī mehnat se phabaktā hai tan-āsānī kā baaġh
jis kī zulmat kī hathelī par tamaddun kā charāġh
jis ke baazū kī salābat par nazākat kā madār
jis ke kas-bal par akaḌtā hai ġhurūr-e-shahryār
dhuup ke jhulse hue ruḳh par mashaqqat ke nishāñ
khet se phere hue muñh ghar kī jānib hai ravāñ
Tokrā sar par baġhal meñ phāoḌā tevrī pe bal
sāmne bailoñ kī joḌī dosh par mazbūt hal
kaun hal zulmat-shikan qindīl-e-bazm-e-āb-o-gil
qasr-e-gulshan kā darīcha sīna-e-gītī kā dil
ḳhushnumā shahroñ kā baanī rāz-e-fitrat kā surāġh
ḳhāndān-e-teġh-e-jauhar-dār kā chashm-o-charāg
Dūbtā hai ḳhaak meñ jo ruuh dauḌātā huā
muzmahil zarroñ kī mausīqī ko chauñkātā huā
jis ke chhū jaate hī misl-e-nāznīn-e-mah-jabīñ
karvaToñ par karvaTeñ letī hai lailā-e-zamīñ
parda-hā-e-ḳhvāb ho jaate haiñ jis se chaak chaak
muskurā kar apnī chādar ko haTā detī hai ḳhaak
jis kī tābish meñ daraḳhshānī hilāl-e-īd kī
ḳhaak ke māyūs matl.a par kiran ummīd kī
tifl-e-bārāñ tājdār-e-ḳhāk amīr-e-bostāñ
māhir-e-ā.īn-e-qudarat nāzim-e-bazm-e-jahāñ
nāzir-e-gul pāsbān-e-rañg-o-bū gulshan-panāh
nāz-parvar lahlahātī khetiyoñ kā bādshāh
vāris-e-asrār-e-fitrat fāteh-e-ummīd-o-bīm
mahram-e-āsār-e-bārāñ vāqif-e-tab.a-e-nasīm
sub.h kā farzand ḳhurshīd-e-zar-afshāñ kā alam
mehnat-e-paiham kā paimāñ saḳht-koshī kī qasam
jalva-e-qudrat kā shāhid husn-e-fitrat kā gavāh
maah kā dil mehr-e-ālam-tāb kā nūr-e-nigāh
qalb par jis ke numāyāñ nuur o zulmat kā nizām
munkashif jis kī farāsat par mizāj-e-sub.h-o-shām
ḳhuun hai jis kī javānī kā bahār-e-rozgār
jis ke ashkoñ par farāġhat ke tabassum kā madār
jis kī mehnat kā araq tayyār kartā hai sharāb
uḌ ke jis kā rañg bin jaatā hai jāñ-parvar gulāb
qalb-e-āhan jis ke naqsh-e-pā se hotā hai raqīq
sho.ala-ḳhū jhoñkoñ kā hamdam tez kirnoñ kā rafīq
ḳhuun jis kā bijliyoñ kī anjuman meñ bāryāb
jis ke sar par jagmagātī hai kulāh-e-āftāb
lahar khātā hai rag-e-ḳhāshāk meñ jis kā lahū
jis ke dil kī aañch ban jaatī hai sail-e-rañg-o-bū
dauḌtī hai raat ko jis kī nazar aflāk par
din ko jis kī uñgliyāñ rahtī haiñ nabz-e-ḳhāk par
jis kī jāñkāhī se Tapkātī hai amrit nabz-e-tāk
jis ke dam se lāla-o-gul ban ke itrātī hai ḳhaak
sāz-e-daulat ko atā kartī hai naġhme jis kī aah
māñgtā hai bhiik tābānī kī jis se rū-e-shāh
ḳhuun jis kā dauḌtā hai nabz-e-istiqlāl meñ
loch bhar detā hai jo shahzādiyoñ kī chaal meñ
jis kā mas ḳhāshāk meñ bantā hai ik chādar mahīn
jis kā lohā maan kar sonā ugaltī hai zamīn
hal pe dahqāñ ke chamaktī haiñ shafaq kī surḳhiyāñ
aur dahqāñ sar jhukā.e ghar kī jānib hai ravāñ
us siyāsī rath ke pahiyoñ par jamā.e hai nazar
jis meñ aa jaatī hai tezī khetiyoñ ko rauñd kar
apnī daulat ko jigar par tīr-e-ġham khāte hue
dekhtā hai mulk-e-dushman kī taraf jaate hue
qat.a hotī hī nahīñ tārīki-e-hirmāñ se raah
fāqa-kash bachchoñ ke dhuñdle āñsuoñ par hai nigāh
sochtā jaatā hai kin āñkhoñ se dekhā jā.egā
be-ridā biivī kā sar bachchoñ kā muñh utrā huā
sīm-o-zar nān-o-namak āb-o-ġhizā kuchh bhī nahīñ
ghar meñ ik ḳhāmosh mātam ke sivā kuchh bhī nahīñ
ek dil aur ye hujūm-e-sogvārī haa.e haa.e
ye sitam ai sañg-dil sarmāya-dārī haa.e haa.e
terī āñkhoñ meñ haiñ ġhaltāñ vo shaqāvat ke sharār
jin ke aage ḳhanjar-e-chañgez kī muḌtī hai dhaar
bekasoñ ke ḳhuun meñ Duube hue haiñ tere haat
kyā chabā Dālegī o kambaḳht saarī kā.enāt
zulm aur itnā koī had bhī hai is tūfān kī
boTiyāñ haiñ tere jabḌoñ meñ ġharīb insān kī
dekh kar tere sitam ai hāmi-e-amn-o-amāñ
gurg rah jaate haiñ dāñtoñ meñ dabā kar uñgliyāñ
iddi.ā-e-pairvi-e-dīn-o-īmāñ aur tū
dekh apnī kuhniyāñ jin se Tapaktā hai lahū
haañ sambhal jā ab ki zahr-e-ahl-e-dil ke aab haiñ
kitne tūfān terī kashtī ke liye be-tāb haiñ
Top Urdushayar.com