Tags-Hawa

un ke aate hī huā hasrat-o-armāñ kā hujūm
aaj mehmān pe mehmān chale aate haiñ

takbīr sar-e-reg-e-ravāñk kaun kahegā
bahtā huā dariyā hai vuzū kaun karegā

koī sunahrī kiran roz ham banā lete
ye barf hotā huā shahr kuchh pighal jaatā

huā hai ishq meñ kam husn-e-ittifāq aisā
ki dil ko yaar to dil yaar ko pasand huā

jī ḳhush huā hai girte makānoñ ko dekh kar
ye shahr ḳhauf-e-ḳhud se jigar-chāk to huā

ye Dastī huī raat guzar jā.egī yaaro
vo hañstā huā din bhī to Dhalne ke liye thā

haath hamāre sab se ūñche hāthoñ hī se gila bhī hai
ghar aise ko sauñp diyā jo aag bhī hai aur havā bhī hai

diye ke jalne aur bujhne kā bhed samajh meñ aa.e to kyā
isī havā se jal bhī rahā thā isī havā se bujhā bhī hai

tez havā ke saath chalā hai zard musāfir mausam kā
os ne dāman thaam liyā to pal-do-pal ko rukā bhī hai

ishq to ik ilzām hai us kā vasl kā to bas naam huā
vo aayā thā qātil ban ke qatl hī kar ke gayā bhī hai

nahīñ haiñ bolne vaale jo chaar sū apne
hamāre kānoñ meñ ye shor kyuuñ bharā huā hai

apnī kashtī ko bhī mil jaatā kināra shāyad
tund thī mauj muḳhālif thī havā kyā karte

huā hai saḳht mushkil dafn honā tere vahshī kā
jahāñ par qabr khodī jaatī hai patthar nikalte haiñ

ibtidā se aaj tak 'nātiq' kī ye hai sarguzisht
pahle chup thā phir huā dīvāna ab behosh hai

is ek ḳhauf se maiñ jañg meñ shahīd huā
adū kamīna hai ta.ane ḳhudā ke māregā

na aa.egī havā ko niiñd kyūñ-kar
zamānoñ kī thakī-hārī huī hai

vo rañg-e-ātshīñ vo dahaktā huā shabāb
chehre ne jaise aag lagā dī naqāb meñ

kisī ne jhāñk kar dekhā na bāhar hī koī aayā
havā ne umr bhar kyā kyā na dastak dī makānoñ par

havā yuuñ hī to ham ko le ke peḌoñ tak nahīñ aa.ī
hamārā naam thā likkhā huā gandum ke dānoñ par

tanz kartā huā guzrā thā havā kā jhoñkā
tab se ham tez havāoñ meñ jalāte haiñ charāġh