Tags-Hawa

hamāre inhimāk kā uḌā mazāq
vahī huā na phir varaq ulaT gayā

ehsās to mujhī pe kar rahī hai
chhūkar jo havā guzar rahī hai

TuuTā huā aks le ke laḌkī
ā.īne meñ phir sañvar rahī hai

sham-e-mahfil huuñ na āshiq na maiñ bū-e-gul huuñ
mah-jabīñ kyuuñ mujhe āñchal kī havā dete haiñ

Dhal rahī hai shab udāsī dard kā aalam huā
ye supurd-e-ḳhāk duniyā faanī faanī rah ga.ī

abrū kī havā bhī na lagī bul-havasoñ ko
us teġh kī roz aañch meñ be-āb jale ham

maiñ thak jā.ūñ to bāzū-e-havā mujh ko sahārā de
girūñ to thaam le shāḳh-e-shajar aisā nahīñ hogā

koī to ho jo mere dard bāñTe
musalsal hijr kā maarā huā huuñ

havā se kis tarah kaheñ
chale to sirf ek hī taraf chale

sher mardoñ se huā besha-e-tehqīq tahī
rah ga.e suufī o mullā ke ġhulām ai saaqī

jab daraḳhtoñ meñ havā loriyāñ gaatī guzrī
tum ne aaise meñ kisī aur ko dekhā hotā

paañv se raaz khulā bādiya-paimā.ī kā
jo phapholā thā DhiñDhorā huā rusvā.ī kā

koī sajda tirī dargāh kī qābil na huā
le chalā daaġh jabīñ par maiñ jabīñ-jā.ī kā

hanūt chehroñ ke ā.inoñ meñ havā kī lahroñ ne ye bhī dekhā
khañDar khañDar par na.e dinoñ kī bashārateñ bhī likhī huī haiñ

zamīñ kī ThanDī tahoñ ke andar alaav karvaT badal rahe haiñ
havā ke sākit pane pe 'at.har' qayāmateñ bhī likhī huī haiñ

merā vajūd harf-e-taqāzā banā huā
mohr-e-qubūl us ke laboñ par hayā ke saath

ābādiyoñ kī ḳhair manāne kā vaqt hai
jañgal kī aag phail rahī hai havā ke saath

hai koī naaz uThāne vaalā
ek TuuTā huā pindār huuñ maiñ

tire badan kī ḳhalāoñ meñ aañkh khultī hai
havā ke jism se jab jab lipaT ke sotā huuñ

jis anjuman se huā qissa-e-junūñ āġhāz
vahīñ kabhī na kahā go kahāñ kahāñ na kahā