Tags-Hawa

jāma-e-aslī bahut kohna huā hai ai 'rashīd'
chaak ho jaa.e na ashk-e-chashm-e-tar ke bojh se

aise bigḌe ki phir jafā bhī na kī
dushmanī kā bhī haq adā na huā

Tik na paayā havā ke jhoñkoñ meñ
par shikasta uḌaan se niklā

masal ye sach hai ki rassī ke bal nahīñ jaate
ukhaḌ chukī hai havā ān-bān baaqī hai

kisī kināre lagā degī mehrbān havā
shikasta naav sahī bādbān baaqī hai

kam-baḳht kabhī na ḳhush huā tū
ai ġham tirī har tarah ḳhushī kī

abhī abhī huā ham tīrgī se nikle haiñ
jahān-e-ishq kī andhī galī se nikle haiñ

havā kā zor hī kaafī bahāna hotā hai
agar charāġh kisī ko jalānā hotā hai

ātish-o-āb-o-havā ḳhāk-o-ḳhalā-o-aflāk
kitne qiloñ pe ba-yak-vaqt hai yalġhār mirī

tez chaltī rahī tanqīd-o-siyāsat kī havā
gard-ālūd havā ā.ina-ḳhāna terā

shahr meñ ahl-e-jafā ahl-e-riyā rahte haiñ
ye havā kaash na pahuñche tire saudā.ī tak

thī us kī band muTThī meñ chiTThī dabī huī
jo shaḳhs thā train ke nīche kaTā huā

misāl-e-mauja-e-havā idhar udhar
ravāñ-davāñ hai intishār shahr meñ

ḳhud apnī zaat pe to e'timād puḳhta huā
'nadīm' yuuñ to mujhe kyā milā vafā kar ke

hamāre haath meñ TuuTā huā hai ā.īna
sarāpā thā to bhalā kaisā vo sarāpā thā

aag andar kī kahāñ murda vo hone degā
bujhte sho.aloñ ko havā de ke guzar jā.egā

ġham-e-āshiqī meñ girah-kushā na ḳhirad huī na junūñ huā
vo sitam sahe ki hameñ rahā na pa.e-ḳhirad na sar-e-junūñ

banā gulāb to kāñTe chubhā gayā ik shaḳhs
huā charāġh to ghar hī jalā gayā ik shaḳhs

maiñ kis havā meñ uḌuuñ kis fazā meñ lahrā.ūñ
dukhoñ ke jaal har ik sū bichhā gayā ik shaḳhs

lau se bahtī huī ziyā ho tum
lau se uThtā huā dhuāñ huuñ maiñ