Tags-Hawa

na ghabrāo jaanā ajī ham bhī samjhe
kahīñ aur bhī aaj va.ada huā hai

na māneñge ham aaj to le chaleñge
bahut roz imroz fardā huā hai

agar tum bhī dekho to rone lagoge
mirī jaan ye haal apnā huā hai

'nasīm' ab kahāñ qadr-dān-e-suḳhan haiñ
kahe sher ye bhī jo charchā huā hai

zahe taqdīr-e-nākāmī ki terī maslahat Thahrī
tirī marzī se vābasta huā allāh re ġham merā

shart hai dard meñ Duubā huā afsāna ho
dil to kyā chiiz hai patthar pe asar hotā hai

ḳham Thoñk mirī huā muqābil
farhād ko duuñ pachhāḌ kar ishq

phir dar-badarī hone lagī us kā muqaddar
phir shauq ke sho.aloñ ko havā dī ga.ī shāyad

is baar bhī sho.aloñ ne machā Daalī tabāhī
is baar bhī sho.aloñ ko havā dī ga.ī shāyad

is hijr o visāl ke biich kahīñ ik lamhe ko jī chāhtā hai
bas abr-o-havā ke saath phiro aur jism o jaañ se guzar jaao

tum reza reza ho kar bhī jo ḳhud ko sameTe phirte ho
so ab ke havā pazhmurda hai is baar zarā sā bikhar jaao

ik tārīk havā kā jhoñkā ruk ke ye mujh se kahtā hai
ye raushan galiyāñ jhūTī haiñ tum 'sābir' apne ghar jaao

is kā nahīñ hai rañj ki taqsīm ghar huā
phūloñ bharī jo bel thī āñgan meñ kaT ga.ī

kabhī samt-e-ġhaib siiñ kyā havā ki chaman zuhūr kā jal gayā
magar ek shāḳh-e-nihāl-e-ġham jise dil kaho so harī rahī

tire josh-e-hairat-e-husn kā asar is qadar siiñ yahāñ huā
ki na ā.īne meñ rahī jilā na parī kuuñ jalvagarī rahī

ġhazab huā unhīñ tinkoñ pe gir paḌī bijlī
jinheñ sambhāl ke rakkhā thā āshiyāñ ke liye

to kyā huā jo tirā pyaar mil nahīñ paayā
tirī ye nafrateñ bhī raas aa rahī haiñ mujhe

havā kī shoḳhiyāñ batlā rahī haiñ terā pata
hasīn titliyāñ rasta dikhā rahī haiñ mujhe

us zulf o ruḳh ke ishq kā charchā huā ye kuchh
hairāñ na.e na.e haiñ pareshāñ na.e na.e

mujhe ġhubār uḌātā huā savār lagā
mirā qayās havāoñ ko nāgavār lagā