mujhe ġhubār uḌātā huā savār lagā
mirā qayās havāoñ ko nāgavār lagā
uchhālne meñ tujhe kitne haath shāmil the
kināre baiTh ke lahroñ kā kuchh shumār lagā
vo būḌhā peḌ jo thā barg-o-bār se mahrūm
ham us se lag ke jo baiThe to sāya-dār lagā
ubuur dariyā ko kartā rahā magar ik baar
hue jo shal mire baazū to be-kanār lagā
nigāh arz-o-samā meñ jo maiñ ne dauḌā.ī
khiñchā huā mujhe chāroñ taraf hisār lagā