Tags-Hawa

rabt-e-jāñ kā jism se TuuTā huā
chhūTtā dāman tirā hāthoñ meñ hai

chaḌhā huā thā jo dariyā utar gayā lekin
hamārī ūñchī imārat Dhahā gayā paanī

phir yuuñ huā ki us ne bhulā hī diyā mujhe
kartā bhī kyā gila maiñ use iḳhtiyār thā

'āfāq' vo judā bhī huā thā to zo.am se
phir us ko yaad karnā bhī ik shāhkār thā

nigah ke sāmne us kā jūñhī jamāl huā
vo dil hī jaane hai us dam jo dil kā haal huā

agar kahūñ maiñ ki chamkā vo barq kī mānind
to kab masal hai ye us kī jo be-misāl huā

qarār o hosh kā jaanā to kis shumār meñ hai
ġharaz phir aap meñ aanā mujhe muhāl huā

idhar se bhar diyā mai ne nigāh kā sāġhar
udhar se zulf kā halqa gale kā jaal huā

bahār-e-husn vo aa.e nazar jo us kī 'nazīr'
to dil vahīñ chaman-e-ishq meñ nihāl huā

gumān hotā hai mujh ko tumhāre aane kā
havā idhar se dabe paañv jab guzartī hai

vahī āñkhoñ meñ aur āñkhoñ se poshīda bhī rahtā hai
mirī yādoñ meñ ik bhūlā huā chehrā bhī rahtā hai

kahīñ gardishoñ ke bhañvar meñ huuñ kisī chaak par maiñ chaḌhā huā
kahīñ merī ḳhaak jamī huī kisī dasht-e-barf-misāl meñ

koī dil meñ samā gayā huā thā
zindagī se maiñ āshnā huā thā

us kā band-e-qabā khulā huā thā
yā koī aks aa.ina huā thā

baat karne ko lafz the hī nahīñ
āñkhoñ āñkhoñ meñ faisla huā thā

koī aayā thā mere ghar meñ aur
saarā āñgan khulā khulā huā thā

kis kī ḳhātir ujaaḌ raste par
phuul le kar shajar khaḌā huā thā

chāñdnī jhiil meñ utarte dekh
peḌ sakte meñ aa gayā huā thā

safīna koī salāmat na rah sakegā ab
qasam-ḳhudā-kī maiñ biphrā huā samundar huuñ

hairat-añgez huā chāhtī hai
aah zarḳhez huā chāhtī hai