Tags-Hawa

miTTī se huā mansūb magar ātiash-ḳhāna sā jaltā huuñ
ka.ī sūraj mujh meñ Duub ga.e mirā saayā kam karne ke liye

mumkin hai ki ab bhī hoñToñ par koī bhūlā bisrā shola ho
maiñ jalte jalte raakh huā lahja maddham karne ke liye

chaḌhā huā thā vo dariyā agar hamāre liye
to dekhte hī rahe kyuuñ utar nahīñ ga.e ham

itnā biinā huuñ ki gulshan kī havā-ḳhvāhī meñ
dekh saktā nahīñ shāḳhoñ kā barahna honā

kaise sulgheñge kākul-e-daurāñ
kitnā uljhā huā savāl hai ye

badan simTā huā aur dasht-e-jāñ phailā huā hai
so tā-hadd-e-nazar vahm o gumāñ phailā huā hai

hamāre paañv se koī zamīñ lipTī huī hai
hamāre sar pe koī āsmāñ phailā huā hai

ye kaisī ḳhāmushī mere lahū meñ sarsarā.ī
ye kaisā shor dil ke darmiyāñ phailā huā hai

tumhārī aag meñ ḳhud ko jalāyā thā jo ik shab
abhī tak mere kamre meñ dhuāñ phailā huā hai

hisār-e-zāt se koī mujhe bhī to chhuḌā.e
makāñ meñ qaid huuñ aur lā-makāñ phailā huā hai

koī ġhul huā thā na shor-e-ḳhizāñ
ujaḌne lagīñ ḳhud-ba-ḳhud bastiyāñ

jī to bharā na apnā kisī tarah kyā huā
dekhā agar use sar-e-bāzār duur se

khiḌkī darvāze band karo masnad bhī sameTo ai logo
mutrib bhī ga.e sham.eñ bhī bujhīñ aur ḳhatm huā afsāna tak

na jazbāt se ye safar tai huā
na dil se kabhī ye zabāñ tak ga.e

ek siyāsī chaal kī ḳhātir kitnā bhayānak qatl huā hai
pūrab pachchhim utar dakhkhin niklā surḳh saverā baabā

bahne vaalī nadiyā ko bhī kab is kā ehsās huā hai
kitnī khetī nashT huī hai jab is ne ruḳh pherā baabā

ḳhaak sahrā meñ uḌātī hai ye dīvānī havā
aur bahāroñ meñ karegī chāk-dāmānī havā

peḌ ukhḌe ghar gire āñdhī chalī chhappar uḌe
chal paḌī jis vaqt ābādī meñ dīvānī havā

garmiyoñ meñ muztarib the log paanī ke liye
bādaloñ ko kar ga.ī barsāt meñ paanī havā

yuuñ huā mahsūs pattoñ ke khaḌakne se mujhe
chupke chupke kartī hai aurāq-gardānī havā