Tags-Hawa

havā kī lahr hai ab jis tarah bhī shohrat de
junūñ purānā na āshufta-sar purāne haiñ

sirf dhundlā.e sitāroñ kī chamak dekhī hai
kab huā kaun huā kis se ḳhafā yaad nahīñ

ye aur baat kahānī sī koī ban jaa.e
harīm-e-nāz ke parde havā se hilte haiñ

ishq baḌhtā rahā sū-e-dār-o-rasan zaḳhm khātā huā muskurātā huā
rāsta rokte rokte thak ga.e zindagī ke badalte hue zāviye

us ke vādoñ se itnā to sābit huā us ko thoḌā sā pās-e-ta.alluq to hai
ye alag baat hai vo hai vāda-shikan ye bhī kuchh kam nahīñ us ne vaade kiye

aap jis peḌ ke saa.e meñ khaḌe haiñ is ko
sehn-e-gulshan nahīñ jaltā huā sahrā kahiye

shab ke māthe pe koī saaya numūdār huā
us ko ab pyaar ke āñgan kā saverā kahiye

havā ke zaḳhm khule the udaas chehre par
ḳhizāñ ke shahar se koTī to pur-bahār gayā

jaane kis dhun meñ chal rahī thī havā
ḳhitta-e-yās meñ sukūñ Thahrā

ye bichhaḌnā to mirī jaan bichhaḌnā na huā
mil ke ro.e bhī nahīñ hashr bhī barpā na huā

ek vahshat sī rahī tujh se bichhaḌ kar dil meñ
lab-e-sākit se magar koī bhī shikva na huā

tujh ko pā kar bhī mukammal nahīñ ho paayā kabhī
aur maiñ tujh se bichhaḌ ke bhī adhūrā na huā

vahshat-e-ishq ne masrūf rakhā tujh meñ sadā
aur tujh ko kabhī mujh par hī bharosa na huā

jā.iye ham bhī ye taslīm kiye lete haiñ
ham ne dekhā thā koī ḳhvāb jo puurā na huā

merī barbādiyāñ durust magar
tū batā kyā tujhe savāb huā

nok-e-shamshīr kī ghaat kā silsila yuuñ pas-e-ā.ina kal utārā gayā
merī pahchān ke aks jitne bane koī zaḳhmī huā koī maarā gayā

qatl ke ba.ad huā hukm ki lāsheñ uTh jaa.eñ
qaid-e-tafrīq se maqtūloñ ke sar jama.a kareñ

chhupā huā huuñ tah-e-sañg ek muddat se
havā kā jhoñkā mirī samt aa nahīñ saktā

nañge paañv kī aahaT thī yā narm havā kā jhoñkā thā
pichhle pahar ke sannāTe meñ dil dīvāna chauñkā thā

zindagī uljhā huā ik silsila
phāñs ik chubhtī huī sāñsoñ meñ hai